Tramp: Putin bir gün çəkməli olan, amma beş ildir davam edən müharibəyə ilişib qalıb

Arxiv foto. Foto: The White House, Public domain, Wikimedia Commons
20-11-2026 22:09

ABŞ prezidenti Donald Tramp noyabrın 20-də Ağ Evdəki mətbuat konfransında Rusiya prezidenti Vladimir Putinin çətin vəziyyətdə olduğunu deyib. “O, bir gün çəkməli olan, amma artıq beş ildir davam edən müharibəyə cəlb olunub, hər iki tərəfdən çoxlu insan ölür. Düşünürəm ki, bu müharibə tezliklə bitəcək”, - Tramp bildirib.

Trampın sözlərinə görə, Çində Putinlə keçirdiyi ikitərəfli görüşdə Rusiya prezidenti müharibəni diplomatik yolla bitirmək istədiyini açıq şəkildə bildirib. ABŞ prezidenti sülh əldə etmək üçün “real şanslar” olduğunu deyib, Putin və Çin lideri Si Cinpinlə “fantastik münasibətləri” olduğunu vurğulayıb.

Tramp Putinlə Ukrayna prezidenti Volodimir Zelenskini bir-birinə nifrət edən və müharibədən necə çıxacağını bilməyən iki lider adlandırıb. “Hər ikisi palçığa ilişib qalıb, eynilə tankları kimi”, - o deyib.

ABŞ prezidenti Ukraynaya təhlükəsizlik zəmanətləri barədə suala isə “Hələlik zəmanətlərdən danışmaq istəmirəm. Əvvəlcə razılaşma əldə etməliyik” cavabını verib. Onun sözlərinə görə, sülh sazişi bağlanandan sonra ABŞ zəmanətlərin müzakirəsində iştirak edəcək.

Bu açıqlamalar “Financial Times” qəzetinin Tramp administrasiyasının Kiyevin Moskva ilə sülh sazişini yanvarın əvvəlinədək bağlamasını istədiyi barədə yazısından sonra səslənib. Putin isə bir gün əvvəl Krım körpüsünə zərbələrdən sonra Ukrayna ilə qismən atəşkəsdən imtina etdiyini bildirmişdi.

Digər xəbərlər