İranın xarici işlər naziri: 60 faizlik zənginləşdirilmiş uran ölkədən çıxarılmayacaq

Foto: Mohammad Hassanzadeh, CC BY 4.0, Wikimedia Commons
21-11-2026 03:21

İranın xarici işlər naziri Abbas Əraqçi Tehranın 60 faizədək zənginləşdirilmiş uran ehtiyatları barədə danışıqlara hazır olduğunu, lakin bu materialın ölkədən çıxarılmayacağını bildirib. Nazir bu barədə “Iran” qəzetinə müsahibəsində danışıb.

Əraqçinin sözlərinə görə, zənginləşdirmə məsələsində “ədalətli formul” tapmaq mümkündür, amma bu, ölkənin milli maraqlarını qoruyan daha geniş razılaşma çərçivəsində həll olunmalıdır. O, İranın rəsmi nüvə doktrinasının dəyişmədiyini də vurğulayıb.

Nazir deyib ki, Tehran indiki “nə müharibə, nə sülh” vəziyyəti əvəzinə yeni müharibənin qarşısını alacaq “yaxşı, ləyaqətli və davamlı razılaşma” istəyir, amma ABŞ-nin öz qələbəsi kimi təqdim edə biləcəyi güzəştlərə getməyəcək. Əraqçi Tehran və Vaşinqtonun Qətər və Pakistan vasitəsilə təklif mübadiləsini davam etdirdiyini təsdiqləyib.

ABŞ maliyyə naziri Skott Bessent isə CNBC telekanalına müsahibəsində bu həftə Şençjendəki danışıqlarda ABŞ, Rusiya və Çinin İranın nüvə silahına sahib olmamalı olduğunu təsdiqlədiyini deyib. Bessentin sözlərinə görə, Vaşinqton Tehran münaqişəni ABŞ-ni qane edən şərtlərlə bitirməyə razılaşanadək iqtisadi təzyiqi davam etdirəcək.

Əraqçinin açıqlaması “CBS News”un ABŞ və İsrailin İrana qarşı yeni hərbi əməliyyat imkanını müzakirə etdiyi barədə xəbərindən sonra gəlir. Azərbaycanın cənub qonşusu İran ətrafındakı gərginlik Hörmüz boğazında gəmiçiliyə və dünya neft bazarına da təsir edir.

Digər xəbərlər