Azərbaycan vətəndaşları bu gündən İordaniyaya vizasız gedə bilər
Azərbaycanla İordaniya arasında qarşılıqlı viza tələbi noyabrın 22-dən ləğv edilib. Dövlət Miqrasiya Xidmətinin məlumatına görə, qayda iki ölkənin ümumvətəndaş pasportu olan vətəndaşlarına aiddir.
Yeni qaydaya əsasən, etibarlı pasportu olan Azərbaycan və İordaniya vətəndaşları digər ölkəyə vizasız gedə, oradan çıxa və tranzit keçə bilərlər. Hər 180 günlük müddətdə ölkədə qalma 90 günü keçməməlidir.
Xidmət qərarın məqsədini səyahəti asanlaşdırmaq, iki ölkə arasında əməkdaşlığı gücləndirmək və turizmi inkişaf etdirmək kimi izah edir.
Dövlət Miqrasiya Xidməti xatırladır ki, Azərbaycanda 15 gündən çox qalan əcnəbilər olduqları yer üzrə qeydiyyata alınmalıdır. Qalma müddətini uzatmaq və ya müvəqqəti yaşama icazəsi almaq üçün “ASAN xidmət” mərkəzlərinə və ya Xidmətin saytındakı elektron xidmətlərə müraciət etmək mümkündür.