İranın Xoy şəhərində baş verən zəlzələ Naxçıvanda da hiss olunub
İranın Qərbi Azərbaycan əyalətindəki Xoy şəhərində 22 noyabr gecəsi 4,5 maqnitudalı zəlzələ baş verib. Təkanlar Naxçıvan Muxtar Respublikasının episentrə yaxın sərhəd rayonlarında da hiss olunub.
AMEA-nın Respublika Seysmoloji Xidmət Mərkəzinin məlumatına görə, zəlzələ Bakı vaxtı ilə saat 01:25-də qeydə alınıb, ocağı 10 kilometr dərinlikdə yerləşib. Naxçıvanın sərhəd rayonlarında təkanların gücü 3 bala çatıb.
Zəlzələ nəticəsində Naxçıvanda dağıntı və ya xəsarət alan olub-olmaması barədə məlumat verilməyib.
Türkiyə və Naxçıvan sərhədinə yaxın yerləşən Xoy seysmik baxımdan aktiv bölgədir. 2023-cü ilin yanvarında şəhərdə baş verən 5,9 maqnitudalı zəlzələdə ölənlər olmuş, yüzlərlə insan yaralanmışdı.