İran mətbuatı Keşikçilər Korpusunun Bəhreyndəki iki ABŞ bazasını vurduğunu yazır, Bəhreyn mülki obyektdə yanğın olduğunu deyir

Arxiv foto (1991, Şeyx İsa aviabazası): TSgt. Paul J. Page, Public domain, Wikimedia Commons
21-11-2026 23:46

İranın “Fars” xəbər agentliyi şənbə axşamı İslam İnqilabı Keşikçiləri Korpusunun (SEPAH) Bəhreyndə yerləşən iki ABŞ hərbi bazasına hücum etdiyini yazıb. Agentliyin məlumatına görə, Şeyx İsa aviabazası və Əl-Cüfeyrdəki baza hədəfə alınıb.

“Fars” hücumu ABŞ-nin hərəkətlərinə “cavab” kimi təqdim edib, lakin hansı hərəkətin nəzərdə tutulduğunu açıqlamayıb. Keşikçilər Korpusu hələlik hücumla bağlı rəsmi açıqlama yaymayıb, bazalarda itki və ya zərər olub-olmadığı da bilinmir.

Bəhreyn Daxili İşlər Nazirliyi “X” sosial şəbəkəsində yazıb ki, İranın hücumu nəticəsində ölkədəki mülki sənaye obyekti vurulub və orada yanğın başlayıb. Nazirliyin ilkin məlumatına görə, mülki müdafiə qüvvələri yanğını söndürməyə çalışır, maddi ziyan var, xəsarət alan barədə məlumat daxil olmayıb.

Əl-Cüfeyrdə ABŞ Hərbi Dəniz Qüvvələrinin Beşinci Donanmasının qərargahı yerləşir, Şeyx İsa isə Bəhreynin əsas hərbi aviabazalarındandır. Hücum xəbəri İranla ABŞ arasında Hörmüz boğazı ətrafında gərginliyin artdığı günlərə düşür: Tehran boğazın açılmasını öz tələblərinin yerinə yetirilməsinə bağlayır, ABŞ Prezidenti Donald Tramp isə İranla “daimi” razılaşma istədiyini deyir.

Körfəzdəki müharibə və Hörmüz boğazındakı hücumlar dünya neft bazarına təsir edir; bu isə neft gəlirindən asılı olan Azərbaycan büdcəsi üçün də önəmlidir.

Digər xəbərlər