Putin: Rusiya, ABŞ və Ukrayna arasında danışıqlar çərşənbə axşamı Əbu-Dabidə başlayacaq
Arxiv foto: Official website of the President of Russia, CC BY 4.0, Wikimedia CommonsRusiya prezidenti Vladimir Putin Ukraynadakı müharibə ilə bağlı Rusiya, ABŞ və Ukrayna arasında üçtərəfli danışıqların gələn həftə, çərşənbə axşamı Birləşmiş Ərəb Əmirliklərində başlayacağını deyib. Putin bunu noyabrın 6-da Təhlükəsizlik Şurasının daimi üzvləri ilə müşavirənin əvvəlində bildirib və görüşə ev sahibliyi etdiyi üçün BƏƏ rəhbərliyinə təşəkkür edib.
Putinin sözlərinə görə, BƏƏ Rusiyaya Ukrayna böhranının həlli yolunu axtarmaqda və humanitar mübadilələrdə ardıcıl kömək edir. Kremlin sözçüsü Dmitri Peskov daha əvvəl danışıqların noyabrın 10-11-də Əbu-Dabidə qapalı keçiriləcəyini, gündəlikdə təhlükəsizlik məsələləri və təhlükəsizlik zəmanətlərinin olacağını demişdi.
Ukrayna heyətinə prezident Volodimir Zelenskinin ofisinin rəhbəri Kirill Budanov başçılıq edəcək. Budanov ABŞ-nin “CBS News” telekanalına deyib ki, danışıqlarda ciddi irəliləyiş gözləmir, amma görüşün baş tutmasını artıq irəliləyiş sayır.
Rusiya heyətinə Putinin köməkçisi Vladimir Medinski rəhbərlik edəcək. “Axios” saytının əvvəl yazdığına görə, ABŞ tərəfini Trampın xüsusi nümayəndəsi Stiv Uitkoff və kürəkəni Cared Kuşner təmsil edəcək.
