Hüquq müdafiəçiləri: İranda yanvar etirazlarının daha iki iştirakçısına ölüm hökmü çıxarılıb

ABŞ-də fəaliyyət göstərən HRANA (Human Rights Activists News Agency) hüquq müdafiə təşkilatı bildirir ki, Məşhəd İnqilab Məhkəməsinin 5-ci şöbəsi yanvardakı hökumət əleyhinə etirazlar zamanı saxlanılan Mətin Şəbani və Əmir Dilşadı ölüm cəzasına məhkum edib. İşlərə hakim Hüseyn Yəzdanxah baxıb.

Təşkilatın məlumatına görə, Şəbani “məharibə”, yəni “Allaha qarşı müharibə” maddəsi ilə təqsirli bilinib. Ona Məşhəd yaxınlığındakı Şandizdə yanvarın 8-9-da keçirilən etirazlarda yandırma və ictimai əmlaka ziyan vurma iddiası ilə ittiham irəli sürülüb. Həmin etirazlarda bir məscid və Quran tədris mərkəzinin yandığı deyilir. Şəbani Vəkilabad həbsxanasında saxlanılır.

Dilşad isə müxalif qrup adından fəaliyyət, yandırma və ictimai əmlaka ziyan vurma iddiaları ilə ölümə məhkum edilib. Onun hökmündən Ali Məhkəməyə şikayət olunub.

HRANA-nın yazdığına görə, avqustda ölüm hökmü alan 23 yaşlı Puriya Hüseyni-Mofrad da Ali Məhkəməyə müraciət edib. Təşkilatın mənbəyi deyir ki, ona qarşı ittihamlar arasında avtobus dayanacağının şüşəsini sındırmaq və kolları yandırmaq da var. Ayrı bir işdə daha üç etirazçının, o cümlədən yanvarda güllə yarası aldığı bildirilən 34 yaşlı Vahid Xıdrıxahın və 23 yaşlı Mətin Fərnianın ölümə məhkum edildiyi bildirilir.

Bu il Məşhəd etirazları ilə bağlı saxlanılanlardan azı beşi Vəkilabad həbsxanasında edam edilib. İran məhkəmə hakimiyyəti onları “Bəsic” hərbiləşdirilmiş qüvvəsinin üzvünün və təhlükəsizlik əməkdaşlarının ölümündə iştirakda ittiham edib. “Amnesty International” isə sentyabrda edam olunan iki nəfərin ədalətsiz məhkəmələrdə, televiziyada göstərilən məcburi etiraflar əsasında məhkum edildiyini bildirib.

Norveçdə yerləşən “Iran Human Rights” təşkilatının hesablamasına görə, yanvardan oktyabrın sonunadək İranda siyasi ittihamlarla azı 81 nəfər edam edilib, onlardan 32-si etirazçı olub.