Cəmil Həsənli: Bacım oğlu Biləsuvar polisində Əli Kərimliyə qarşı çıxış etməkdən imtina etdiyi üçün döyülüb

Milli Şuranın sədri, tarixçi Cəmil Həsənli bacısı oğlu Aqil Əliyevin Biləsuvar Rayon Polis Şöbəsində saxlanıldığını və bütün gecə döyüldüyünü bildirib. Həsənli noyabrın 6-da sosial şəbəkədə yazıb ki, bunun səbəbi Aqil Əliyevin həbsdəki Azərbaycan Xalq Cəbhəsi Partiyasının (AXCP) sədri Əli Kərimliyə və ona qarşı ictimai çıxış etməkdən imtina etməsidir.

Həsənlinin yazdığına görə, bir gün əvvəl bir qrup polis əməkdaşı Biləsuvarda idman zalına gələrək Aqil Əliyevi polis şöbəsinə aparıb. Orada ondan televiziyaya çıxıb Əli Kərimlinin və Cəmil Həsənlinin “xalqı pis yola çəkdiyini” deməsi, gənclərə onlara inanmamağı tövsiyə etməsi istənilib.

Həsənlinin iddiasına görə, Aqil Əliyev bundan imtina edəndən sonra Biləsuvar Rayon Polis Şöbəsinin rəisi Nəsib Məmmədovun göstərişi ilə döyülüb, iki qızı ilə hədələnib, avtomobili isə polis şöbəsində saxlanılıb. “Bütün gecəni polis şöbəsində döyülən Aqilin bədəni qançırlardan ibarətdir”, - Həsənli yazıb.

Siyasətçi baş verənləri Əli Kərimlinin məhkəmə prosesi dövründə ona və yaxınlarına qarşı hazırlanan kampaniyanın bir hissəsi kimi qiymətləndirib. Onun sözlərinə görə, bacısı oğlu əvvəllər də təzyiqlə üzləşib: bir neçə il əvvəl Aqil Əliyevin toyu ərəfəsində polis əməkdaşları Həsənlinin toya gəlməməsini tələb ediblər.

Daxili İşlər Nazirliyi və Biləsuvar Rayon Polis Şöbəsi iddialarla bağlı hələlik açıqlama verməyib.

Əli Kərimli və onun müavini Məmməd İbrahim ötən ilin noyabrında həbs olunublar, onlara hakimiyyəti zorla ələ keçirməyə cəhd ittihamı irəli sürülüb. Hər iki siyasətçi ittihamı qəbul etmir. Cəmil Həsənlinin özünə isə Ramiz Mehdiyevlə bağlı istintaqda şahid kimi dindirildikdən sonra ölkədən çıxış qadağası qoyulub və o, qadağanın Mehdiyevin məhkəməsi bitəndən sonra da qüvvədə qaldığını deyir.