“The New York Times”: ABŞ qüvvələri Trampın əmri ilə İrana qarşı döyüşləri bərpa etməyə hazırdır

ABŞ-nin Yaxın Şərqdəki bazalarında, ölkənin öz ərazisində və ondan çox gəmidə yerləşən minlərlə hava və dəniz qüvvələri hərbçisinin Prezident Donald Trampın əmri olsa, İrana qarşı geniş döyüş əməliyyatlarını yenidən başlatmağa hazır vəziyyətdə olduğu bildirilir.

“The New York Times” qəzeti adını açıqlamayan Pentaqon rəsmilərinə və hərbi komandirlərə istinadən yazır ki, qüvvələr əmr gözləyir. Qəzetin bu məlumatı noyabrın 4-də yayılıb.

ABŞ və İsrailin İrana qarşı fevralın sonunda başladığı müharibə hələ başa çatmayıb. Tehran o vaxtdan bəri normalda dünyada istehlak olunan neftin təxminən beşdə birinin keçdiyi Hörmüz boğazında gəmi hərəkətini ciddi şəkildə məhdudlaşdırır. İran ordusu və İslam İnqilabı Keşikçiləri Korpusu noyabrın 5-də boğazda azı beş tankerin minaya düşərək alışdığını bildirib.

Vasitəçilik edən Qətərin Xarici İşlər Nazirliyinin sözçüsü noyabrın 4-də deyib ki, hər iki tərəf vasitəçilərin irəli sürdüyü təklifləri nəzərdən keçirir və danışıqlar davam edir.

İranın Ali Rəhbəri Müctəba Xamenei isə ABŞ-yə “ən kiçik təslimçilik meylinin belə” olmamalı olduğunu deyib. Onun sözlərinə görə, Vaşinqtonda hansı partiyanın hakimiyyətdə olmasından asılı olmayaraq ABŞ İrana düşmən qalacaq. Keşikçilər Korpusunun Quru Qoşunlarının komandanı Məhəmməd Kərəmi də İranın düşmənlərinin “düşməncəsinə və vəhşicəsinə hərəkətlərinin” davam edəcəyi təqdirdə bunun İranın “yeni qələbələrinə” səbəb olacağını bəyan edib.