Azərbaycanda məktəblərin bir qismi gələn ildən adambaşına maliyyələşməyə keçirilir

Maliyyə naziri Sahil Babayev Milli Məclisin komitələrinin birgə iclasında 2027-ci il dövlət büdcəsinin layihəsi müzakirə olunarkən deyib ki, bu il müəyyən sayda məktəb adambaşına maliyyələşmə mexanizminə keçib, gələn il isə məktəblərin daha geniş bir qismi bu sistemə keçiriləcək. Məktəbəqədər təhsil müəssisələri də tədricən bu mexanizmə keçəcək.

Adambaşına maliyyələşmədə vəsait məktəbin saxlanma xərclərinə görə deyil, hər şagirdə görə ayrılır. Nazir xatırladıb ki, ali təhsildə bu mexanizm bir neçə ildir tətbiq olunur və universitetlərə pul hər tələbəyə görə ödənilir.

Babayevin sözlərinə görə, büdcə layihəsində ümumi təhsil xərclərinin azalması da bununla bağlıdır: adambaşına maliyyələşmə üzrə xərclər təhsil bölməsində deyil, ayrıca bölmədə göstərilir. “Ona görə də heç bir azalma yoxdur”, - deyə nazir bildirib.

Nazir mexanizmi “kifayət qədər uğurlu” adlandırıb və onun ilkin təhsil pillələrində də genişləndiriləcəyini deyib. O, gələn il neçə məktəbin yeni sistemə keçəcəyini dəqiqləşdirməyib.