Kreml: Əbu-Dabidə Ukrayna danışıqlarında Rusiya heyətinə Putinin köməkçisi başçılıq edəcək, Putinin Tramp və Si ilə görüşü də razılaşdırılır

Kremlin sözçüsü Dmitri Peskov noyabrın 3-də Rusiya, ABŞ və Ukrayna arasında üçtərəfli danışıqların noyabrın 10-11-də Əbu-Dabidə keçiriləcəyini təsdiqləyib. Onun sözlərinə görə, Rusiya heyətinə Prezident Vladimir Putinin köməkçisi Vladimir Medinski rəhbərlik edəcək.

Peskov Putin, ABŞ prezidenti Donald Tramp və Çin lideri Si Cinpinin Asiya-Sakit Okean İqtisadi Əməkdaşlığı sammitində görüşməsi üzərində də iş getdiyini deyib. “Belə görüşün məqsədəuyğun və çox faydalı olacağı barədə iştirakçılar arasında ümumi anlayış var”, - Peskov bildirib və görüşün yaxın günlərdə razılaşdırılacağına ümid etdiyini əlavə edib.

Rusiyanın xarici işlər naziri Sergey Lavrov isə Minskdə keçirilən Avrasiya təhlükəsizliyi konfransında Avropa ölkələrinin atəşkəs çağırışlarının sülh üçün olmadığını iddia edib. Onun sözlərinə görə, bu çağırışlar “yalnız Kiyevə nəfəs almaq imkanı vermək” məqsədi daşıyır.

Bu açıqlamalar Rusiyanın Ukraynaya kütləvi zərbələri fonunda verilib. Latviyanın xarici işlər naziri Baiba Braje “X” sosial şəbəkəsində ölkəsinin Rusiyanın mülki əhaliyə hücumlarına görə BMT Təhlükəsizlik Şurasının fövqəladə iclasını çağırdığını yazıb. O, Zaporojye vilayətinin Komışuvaxa qəsəbəsindəki humanitar yardım məntəqəsində ən azı 26 mülki şəxsin öldüyünü bildirib, Ukrayna prezidenti Volodimir Zelenski isə ölənlərin sayının 29-a çatdığını demişdi.