Britaniya dəniz agentliyi: Qətər sahillərində neft tankeri iki naməlum mərmi ilə vurulub
Arxiv foto, Fars körfəzində tanker: Richard J. Brunson/ABŞ Hərbi Dəniz Qüvvələri, Public domain, Wikimedia CommonsFars körfəzində neft tankeri iki naməlum mərmi ilə vurulub. Bunu Britaniyanın Dəniz Ticarəti Əməliyyatları Mərkəzi (UKMTO) bildirib.
Agentliyə görə, hadisə Qrinviç vaxtı ilə noyabrın 4-də saat 23:20-də, Qətərin Mədinət əş-Şamal şəhərindən təxminən 50 dəniz mili şimalda baş verib. Heyətin vəziyyəti, tankerə dəyən ziyan və ətraf mühitə mümkün təsir barədə hələlik məlumat yoxdur. Mərmilərin kim tərəfindən atıldığı bildirilmir.
Eyni ərazidə oktyabrın 7-də də UKMTO tankerin bir neçə mərmi ilə vurulduğunu və zərər çəkənlər olduğunu açıqlamışdı. Həmin gün məsuliyyəti heç kim üzərinə götürməyib.
Körfəzdə gərginlik neft bazarına birbaşa təsir edir. İran İnqilab Keşikçiləri də noyabrın 5-də Hörmüz boğazında iki tanker və bir yedək gəmisinin alışdığını demişdi.
