Paşinyan KTMT Baş katibinə cavab verib: Bu təşkilatla bağlı maraqlarımız tükənib

Ermənistanın Baş naziri Nikol Paşinyan noyabrın 5-də brifinqdə Kollektiv Təhlükəsizlik Müqaviləsi Təşkilatı (KTMT) barədə sualı cavablandırıb. "Bir dəfəlik bildirmək istəyirəm: KTMT ilə bağlı maraqlarımız tükənib", - Paşinyan deyib.

Sual KTMT Baş katibi Taalaibek Masadıkovun bir gün əvvəlki açıqlaması ilə bağlı olub. Masadıkov Rusiyanın Ermənistanın təşkilatda səsvermə hüququnun dayandırılması üçün qərar layihəsi hazırladığını demişdi. Ona görə, məsələ noyabrın 10-da Kollektiv Təhlükəsizlik Şurasının iclasının gündəliyinə düşərsə, müzakirə olunacaq.

Paşinyan Rusiyanın başçılıq etdiyi Avrasiya İqtisadi İttifaqından çıxmaq niyyətində olmadıqlarını da deyib, baxmayaraq ki, ittifaqdakı həmkarları Yerevandan mövqeyini aydınlaşdırmağı və referendum keçirməyi tələb edirlər. Onun sözlərinə görə, hazırda referendum üçün əsas yoxdur: Avropa İttifaqına üzvlük barədə referendumdan əvvəl bəzi prosedurlar tamamlanmalıdır.

Baş nazir Brüsseldə dediyi sözü təkrarlayıb: "Proses elə bir istiqamətdə gedir ki, tam üzvlük prosesinə başlamaq üçün 2027 və ya 2028-ci ildə rəsmi müraciət edə bilək". O, bunun üzvlüyə hazırlığın başlaması demək olmadığını, Ermənistanın xalqa söz verdiyi kimi alternativ hazırladığını bildirib.