DTX: Separatçı qruplar yaratmaqda ittiham olunan şəxs bir illik beynəlxalq axtarışdan sonra Azərbaycana gətirilib, məhkəməsi başlayıb

Dövlət Təhlükəsizliyi Xidməti (DTX) noyabrın 3-də yaydığı məlumatda bildirib ki, 2025-ci ildən beynəlxalq axtarışda olan Murad Qərib oğlu Fetiyev Azərbaycana gətirilib və istintaqa cəlb edilib. Xidmət onun hansı ölkədən və hansı yolla gətirildiyini açıqlamayıb.

DTX-nin iddiasına görə, Fetiyev xaricdən idarə olunan “radikal mərkəzlərin” tapşırığı ilə Azərbaycanın ərazi bütövlüyünü parçalamaq və milli nifrət salmaq məqsədilə sosial şəbəkələrdə qruplar yaradıb, xaricdə və Azərbaycanda yaşayan azsaylı etnik qrupun “ekstremist ideyalar daşıyan” nümayəndələrini həmin qruplara cəlb edib. Xidmət etnik qrupun adını çəkməyib.

Xidmət həmçinin iddia edir ki, o, qruplardan radikal baxışlı şəxslərin seçilməsini, ölkədəki strateji obyektlər barədə məlumat toplanmasını və terrorçuluğa açıq çağırışları təşkil edib. DTX-yə görə, həmin qruplaşmanın bəzi üzvləri bir müddət əvvəl dövlət müəssisəsinə basqın etməyə və insanları girov götürməyə hazırlıq hərəkətlərinə görə həbs olunublar.

Fetiyev Cinayət Məcəlləsinin 214-2 (terrorçuluğa açıq çağırışlar), 283-1 (milli, irqi, sosial və ya dini nifrət və düşmənçiliyin salınması) və digər maddələri ilə ittiham olunur. DTX iş üzrə məhkəmə baxışının artıq başladığını deyir, hansı məhkəmədə baxıldığını isə göstərmir.

Fetiyevin və ya vəkilinin ittihamlara münasibəti hələlik məlum deyil. Məhkəmə hökmü olmadığı üçün DTX-nin açıqladığı hallar hələlik yalnız ittiham tərəfinin iddialarıdır.