Gürcüstanın Qardabani rayonunda azərbaycanlı iş adamının avtomobili atəşə tutulub

Foto: Zviad Avaliani, Attribution, Wikimedia Commons
22-11-2026 18:52

Gürcüstanın azərbaycanlılar yaşayan Qardabani rayonunun Qaracalar kəndində azərbaycanlı iş adamı Duriç Hacıyevin avtomobilinə atəş açılıb. Hadisə Hacıyev azyaşlı övladları ilə birlikdə evə qayıdarkən baş verib; xəsarət alan olmayıb.

Gürcüstan Daxili İşlər Nazirliyinin məlumatına görə, hadisə ilə bağlı bir nəfər saxlanılıb. Ona ağırlaşdırıcı hallarda qəsdən adam öldürməyə cəhddə iştirak ittihamı irəli sürülüb.

Nazirlik hadisə ilə əlaqəsi olduğu bildirilən ikinci şəxsin axtarışının davam etdiyini də açıqlayıb.

Gürcüstan mediasının yazdığına görə, hücumun maliyyə mübahisəsi ilə bağlı ola biləcəyi ehtimal edilir. Rəsmi qurumlar hücumun səbəbi barədə hələlik açıqlama verməyib.

Qardabani Tbilisinin cənub-şərqində, Azərbaycanla sərhəddə yerləşir və Gürcüstanda azərbaycanlıların sıx yaşadığı Borçalı bölgəsinin bir hissəsidir.

Digər xəbərlər