Rusiyanın ilhaq etdiyi Krımda işıq kəsintilərinə görə məktəb tətili uzadılıb, Moskva kəsintiləri Ukraynanın zərbələri ilə izah edir

Rusiyanın təyin etdiyi Krım rəhbəri Sergey Aksyonov elektrik kəsintiləri fonunda məktəb tətilinin uzadıldığını bildirib. O, səbəb kimi "yaranmış çətin vəziyyəti" göstərib və dərslərin noyabrın 9-da bərpa olunacağını deyib. Plana görə, payız tətili noyabrın 3-də bitməli idi.

Noyabrın 3-nə keçən gecə Krım işıqsız qalıb. Yerli hakimiyyət əvvəlcə bunu magistral şəbəkələrdə qəza ilə izah edib. Kəsintilər noyabrın 4-də də davam edib və Rusiya Energetika Nazirliyi səbəbin Ukrayna ordusunun enerji infrastrukturuna zərbələri olduğunu qəbul edib.

Rusiyanın müstəqil "Meduza" nəşri yazır ki, Ukrayna ordusu iyunda Krımın elektrik təchizatını pozmağa yönəlmiş kampaniyaya başlayıb. O vaxtdan yarımada dəfələrlə işıqsız qalıb, bu da su təchizatında problem yaradıb.

Rusiya Müdafiə Nazirliyi noyabrın 4-də bir gecədə Ukraynanın 709 dronunu vurduğunu açıqlamışdı. Krım 2014-cü ildən Rusiyanın nəzarətindədir, Ukrayna və beynəlxalq ictimaiyyətin böyük hissəsi onu Ukrayna ərazisi sayır.