Rusiya bir gecədə 496 Ukrayna dronunu vurduğunu deyir, Ryazan qubernatoru sənaye obyektlərində yanğın başladığını bildirir

Rusiya Müdafiə Nazirliyi çərşənbə günü saat 20:00-dan cümə axşamı səhər 08:00-dək 496 Ukrayna dronunu vurduğunu bildirib. Nazirliyin siyahısında Moskva vilayəti, Rusiyanın 12 vilayəti, Krasnodar diyarı, Rusiyanın ilhaq etdiyi Krım, Azov və Qara dəniz akvatoriyaları var.

Ryazan vilayətinin qubernatoru Pavel Malkovun sözlərinə görə, "dağıntıların düşməsi" nəticəsində şəhərdəki sənaye obyektlərində yanğın başlayıb. Qubernator hansı obyektlər olduğunu dəqiqləşdirməyib. O deyir ki, elektrik xətləri zədələndiyi üçün Ryazanda işıq kəsintiləri var, bir məktəbin şüşələri sınıb və dərslər ləğv olunub, Ryazan dairəsində evlər zədələnib, bir nəfər xəsarət alıb.

"Exilenova+" və "Supernova+" adlı Ukrayna monitorinq kanalları dronların Ryazan neft emalı zavoduna hücum etdiyini və orada yanğın başladığını iddia edir. Müstəqil Rusiya mediası "Astra" isə yerli sakinlərə istinadən "Wildberries" şirkətinin logistika mərkəzində yanğın olduğunu yazır, şirkət hələlik şərh verməyib.

"Rosneft"ə məxsus zavod əvvəl də hədəf olub. "Reuters" agentliyi 2025-ci ilin noyabrında mənbələrə istinadən yazmışdı ki, Ukraynanın hücumundan sonra zavodun gücünün 48 faizini təşkil edən əsas qurğu dayanıb.

Rusiya Müdafiə Nazirliyi həmin gecə özünün də Qara dənizdə, Odessadan 52 kilometr cənub-qərbdə "hərbi əmlak" daşıyan yük gəmisini dronla vurduğunu deyir.