Paşinyan: Ermənistanın yeni Konstitusiyasının layihəsi gələn həftə dərc olunacaq
Ermənistanın Baş naziri Nikol Paşinyan yeni Konstitusiyanın ilkin layihəsinin gələn həftə dərc olunacağını açıqlayıb. Paşinyan bunu noyabrın 19-da hökumətin iclasında deyib.
“Yeni Konstitusiyanın qəbulu bəndi proqramımızda böyük əhəmiyyət daşıyır. Yaxın vaxtlarda bu prosesin praktiki icrası mərhələsinə keçəcəyik”, - deyə Paşinyan bildirib. Onun sözlərinə görə, layihədə əvvəlki dövrdə, o cümlədən seçki kampaniyası zamanı müzakirə olunan əsas siyasi müddəalar yer alır.
Azərbaycan sülh sazişinin imzalanmasını Ermənistan Konstitusiyasının dəyişdirilməsi ilə şərtləndirir; Bakı Konstitusiyanın preambulasındakı Müstəqillik Bəyannaməsinə istinadı ərazi iddiası sayır. Ermənistan Təhlükəsizlik Şurasının katibi Alen Simonyan da noyabrın 19-da sülh sazişinin Konstitusiya dəyişdikdən sonra imzalanacağını deyib.
Simonyanın sözlərinə görə, yeni Konstitusiyaya ehtiyac təkcə Bakı ilə sülh gündəliyindən irəli gəlmir. “1990-cı illərdə qəbul olunmuş Konstitusiya ilə bugünkü reallıqlar, indiki geosiyasi vəziyyət tamamilə fərqlidir. Beş il əvvəlki Ermənistan ilə bugünkü Ermənistan eyni deyil”, - deyə o bildirib.
Paşinyan bir gün əvvəl parlamentdə vətəndaşlar referendumda yeni Konstitusiyaya “yox” desələr, istefa verəcəyini demişdi.


