Kreml: Putin və Tramp Çindəki APEC sammitində bir neçə dəfə görüşəcək

Foto: Benjamin D Applebaum, Public domain, Wikimedia Commons
18-11-2026 13:38

Rusiya prezidentinin beynəlxalq məsələlər üzrə köməkçisi Yuri Uşakov Vladimir Putinlə Donald Trampın Çinin Şençjen şəhərində keçirilən APEC sammiti çərçivəsində bir neçə dəfə söhbət edəcəyini deyib. Onun sözlərinə görə, ilk görüş elə noyabrın 18-i axşam, liderlərin təntənəli şam yeməyində ola bilər.

Uşakov tam ikitərəfli görüşün olub-olmayacağı sualına cavab verərkən deyib ki, liderlər oturub danışsalar da, ayaq üstə bir-birinin gözünə baxaraq danışsalar da, aralarında “dolğun söhbət” olacaq. “Görüş olacaq”, - deyə Kreml rəsmisi bildirib.

Tramp noyabrın 18-də Şençjenə çatıb. Çinin Sinxua agentliyinin məlumatına görə, onu təyyarənin pilləkəni yanında Çin lideri Si Cinpin şəxsən qarşılayıb. Putin isə Şençjenə bir gün əvvəl gəlib və artıq Si Cinpinlə danışıqlar aparıb.

Kremlin sözçüsü Dmitri Peskovun sözlərinə görə, noyabrın 19-da sammit çərçivəsində Putin, Si Cinpin və Tramp arasında üçtərəfli görüş keçiriləcək; bu, üç ölkə liderinin ilk belə görüşü olacaq. Tramp bazar ertəsi görüşün mövzuları arasında Ukrayna, İran və nüvə tərksilahının olacağını deyib.

Hər iki mövzu Azərbaycanın qonşuları ilə bağlıdır: Rusiya Ukraynadakı müharibəni davam etdirir, Azərbaycanla həmsərhəd olan İran isə ABŞ və İsraillə hərbi qarşıdurma içindədir. APEC 21 Asiya-Sakit okean iqtisadiyyatını, o cümlədən Rusiya, Çin və ABŞ-ni birləşdirir.

Digər xəbərlər