Əsgərin ölümündə təqsirli bilinən hərbi həkimə 2 il 8 ay həbs cəzası verilib
Füzuli Hərbi Məhkəməsi Müdafiə Nazirliyinin hərbi hissələrindən birinin cərrahiyyə bölməsinin baş ordinatoru N.A.-nı əsgər Əli İbrahimlinin ölümündə təqsirli bilərək 2 il 8 ay həbs cəzasına məhkum edib. O, cəzasını məntəqə tipli müəssisədə çəkəcək. Məhkəmə əsgərin ailəsinin mülki iddiasını da təmin edib: həkim 6 min manat maddi, 3 min manat mənəvi ziyan ödəməlidir.
APA agentliyinin əldə etdiyi məlumata görə, hökmü hakim Əli Süleymanov elan edib. İttihama görə, əsgər özünü pis hiss etdiyi üçün hissənin tibb məntəqəsinə müraciət edib, növbətçi həkim onda taxikardiya aşkarlayıb və onu başqa hərbi hissəyə təxliyə edib.
Orada əsgər cərrahiyyə bölməsinin baş ordinatoruna ürəyinin təxminən iki aydır ağrıdığını deyib. İttihama görə, həkim bu barədə aidiyyəti üzrə məlumat verməyib, klinik protokolun tələblərini pozub, zəruri müayinələri aparmayıb və yalnız əsgərin təzyiqini ölçüb. Əsgərin təcili tibbi yardıma ehtiyacı olsa da, onun xidmət etdiyi hissəyə qaytarılması barədə göstəriş verib.
Hissəyə qayıtdıqdan qısa müddət sonra əsgərin səhhəti yenidən pisləşib; o, hospitala aparılsa da, həyatını xilas etmək mümkün olmayıb. Həkim Cinayət Məcəlləsinin 342.1-1-ci maddəsi ilə, qulluq vəzifəsinə səhlənkar yanaşmanın ehtiyatsızlıqdan ölümə səbəb olmasına görə mühakimə olunub.


