Milli Məclisin 2027-ci il xərcləri 37 faiz artaraq 72,4 milyon manata çatır

Foto: Tony Bowden, CC BY-SA 2.0, Wikimedia Commons
18-11-2026 12:02

2027-ci ildə Milli Məclisin və onun aparatının saxlanılmasına dövlət büdcəsindən 72 milyon 355 min manat ayrılması nəzərdə tutulur. Bu il parlamentin büdcəsi 52,74 milyon manat olub, yəni xərclər bir ildə təxminən 19,6 milyon manat artır.

Rəqəmləri Milli Məclisin işlər müdiri Firudin Hacıyev parlamentin 2027-ci il xərclər smetasının layihəsini deputatlara təqdim edərkən açıqlayıb. Smetaya görə, 59 milyon 356 min manat əmək haqqına yönəldiləcək: bunun 47,6 milyon manatı deputatların, parlament aparatı və İşlər İdarəsi əməkdaşlarının, deputat köməkçilərinin maaşlarıdır, 11,7 milyon manatı isə dövlət sosial sığortası, tibbi sığorta və işsizlikdən sığorta ayırmalarıdır.

Bundan əlavə, 762,6 min manat icbari dövlət şəxsi sığortasına, 334 min manat isə müavinətlər daxil olmaqla sosial ödənişlərə ayrılır. Qalan vəsait mal və xidmət alışına, xarici ezamiyyətlərə, xarici nümayəndə heyətlərinin qəbuluna, avadanlıq və təsərrüfat xərclərinə sərf olunacaq.

Hacıyevin sözlərinə görə, smeta hazırlanarkən deputatların xarici səfərlərinin, ölkəyə gələn xarici qonaqların və parlamentin təşkil etdiyi beynəlxalq tədbirlərin sayının artması nəzərə alınıb. O, 2027-ci ildə parlamentin xidməti otaqlarında texniki avadanlığın yenilənməsinin davam edəcəyini də deyib.

Digər xəbərlər