Almaniya xarici işlər naziri Bakıda enerji danışığı aparıb, Berlində isə siyasi məhbuslar üçün aksiya davam edir

Foto: Olaf Kosinsky, CC BY-SA 3.0 de, Wikimedia Commons
18-11-2026 15:45

Prezident İlham Əliyev noyabrın 17-də Almaniyanın xarici işlər naziri Yohann Vadefulu Bakıda qəbul edib. Görüşdə iki ölkə arasında siyasi və iqtisadi əlaqələr, enerji əməkdaşlığı, nəqliyyat və logistika layihələri müzakirə olunub. Eyni vaxtda Berlində Almaniya Xarici İşlər Nazirliyinin binası qarşısında azərbaycanlılar Azərbaycandakı siyasi məhbusların, o cümlədən həbsdəki jurnalistlərin azad edilməsi tələbi ilə oturaq aksiyanı ikinci gün davam etdiriblər.

Görüşdən sonra Vadeful və Azərbaycanın xarici işlər naziri Ceyhun Bayramov birgə mətbuat konfransı keçirib. Bayramov Azərbaycanın Almaniyaya təbii qaz ixracına başladığını, hazırda 10-u Avropa İttifaqı üzvü olmaqla 16 ölkəyə qaz verdiyini deyib. Vadeful Avropanın enerji təchizatının təhlükə altında olduğunu, yeni mənbələr və etibarlı tərəfdaşlar tapmağın vacibliyini vurğulayıb və Azərbaycanı Almaniyanın etibarlı enerji tərəfdaşlarından biri adlandırıb. Tərəflər Almaniyanın Xəzər dənizi üzərindən çəkilməsi planlaşdırılan elektrik kabeli layihəsindən faydalanma imkanını da müzakirə ediblər.

Bayramovun sözlərinə görə, iki ölkə arasında 80 saziş və sənəd qüvvədədir, daha 10 sənəd üzərində iş gedir. Danışıqlarda Orta Dəhliz, Ələt Azad İqtisadi Zonası, birbaşa reyslərin artırılması və Azərbaycan-Almaniya universitetinin yaradılması mövzuları da olub. Vadeful Azərbaycan-Almaniya Biznes Şurasının yaxın vaxtlarda işə başlayacağını deyib.

Bayramov qonağa Ermənistanla normallaşma prosesi barədə məlumat verib, Qarabağa təxminən 100 min azərbaycanlının köçürüldüyünü və mina təhlükəsinin qaldığını deyib. Vadeful 2025-ci ilin avqustundakı Vaşinqton görüşünün yaratdığı imkanı alqışlayıb və sülh sazişinin yekunlaşmasına ümid etdiyini bildirib. Həmin görüşdə İlham Əliyev və Nikol Paşinyan sülh sazişini paraflayıb, lakin hələ imzalamayıblar. Alman nazirinə görə, sülh prosesi Yerevandakı danışıqlarının da əsas mövzularından biri olacaq.

Berlindəki aksiya yeni deyil: siyasi mühacirlər 15 iyunda başlayan kampaniya çərçivəsində iyulda Əliyevin Almaniyaya səfəri zamanı da həbsdəki jurnalistlərin, siyasətçilərin və dindarların azadlığını tələb ediblər. Elə həmin səfərdə iki ölkə strateji tərəfdaşlıq gündəliyi barədə birgə bəyannamə imzalamışdı. Bundan əvvəl, 2025-ci ildə Almaniya Prezidenti Frank-Valter Ştaynmayerin Dağlıq Qarabağla bağlı simvollar olan paylaşımına görə Bakı Almaniya səfirini çağırmış, prezident ofisi sonradan üzr istəmişdi.

Digər xəbərlər