Polisin onu döydüyünü deyən kuryer şikayəti yayılandan bir gün sonra 30 sutka həbs olunub

Foto: Ephraim Stillberg, CC BY-SA 3.0, Wikimedia Commons
20-11-2026 19:43

Bakıda Xətai Rayon Dövlət Yol Polisi Şöbəsində döyüldüyünü deyən kuryer Məhəmməd Məmmədxanov 30 sutka inzibati həbs olunub. Onun yaxınlarının sözlərinə görə, kuryer saxlanılaraq Xətai Rayon Məhkəməsinə aparılıb və xuliqanlıq ittihamı ilə cəzalandırılıb.

Həbs barədə “Meydan TV” xəbər verir. Nəşr bir gün əvvəl, noyabrın 19-da, Məmmədxanovun şikayəti barədə videosüjet yayımlamışdı. Həbs bu süjetdən bir gün sonraya düşür.

Kuryerin dediyinə görə, o, restorandan Xətai Rayon Dövlət Yol Polisi Şöbəsinə yemək sifarişi aparıb, bu vaxt park etdiyi motosikleti cərimə meydançasına aparılıb. Motosikleti geri almaq üçün ona rəis müavininin qəbuluna getmək tövsiyə olunub.

Məmmədxanov iddia edir ki, qəbul zamanı polis əməkdaşları onu təhqir edib və döyüblər. Sonra o, baş verənləri sosial şəbəkələrdə paylaşıb. Onun sözlərinə görə, görüntüləri və şikayətini silməsi müqabilində ona 500 manat təklif edilib.

Digər xəbərlər