Həbsdəki jurnalist Hafiz Babalı “Baku TV”yə qarşı işdə Ali Məhkəməyə şikayət verməsinə maneə yaradıldığını deyir

Arxiv foto: Hafiz Babalı. VOA, Public domain, Wikimedia Commons
09-11-2026 13:23

“Abzas Media işi” üzrə 9 il azadlıqdan məhrum edilən jurnalist Hafiz Babalı “Baku TV” kanalına qarşı qaldırdığı böhtan iddiasını Ali Məhkəməyə çıxara bilmədiyini bildirir. O deyir ki, Bakı Apellyasiya Məhkəməsinin qərarı indiyədək ona rəsmi qaydada verilməyib, saxlanıldığı 2 saylı Cəzaçəkmə Müəssisəsinin rəhbərliyi isə kassasiya şikayəti ilə bağlı ərizəsini qəbul etməyib.

“Abzas Media” jurnalistin yaxınlarına istinadən xəbər verir ki, Babalı “Baku TV” MMC-nin efirində barəsində böhtan yayıldığını deyərək məhkəməyə müraciət edib. O, məlumatın təkzib olunmasını, kanalın üzr istəməsini və mənəvi zərərə görə 50 min manat kompensasiya ödənilməsini tələb edib. Nəsimi Rayon Məhkəməsi iddianı rədd edib, Bakı Apellyasiya Məhkəməsi isə aprelin 22-də hakim Günel Abbasovanın sədrliyi ilə keçən prosesdə bu qərarı qüvvədə saxlayıb.

Mübahisə qərarın Elektron Məhkəmə Sisteminə nə vaxt yerləşdirilməsi üzərindədir. Apellyasiya məhkəməsi bunun aprelin 29-da edildiyini bildirir, Babalı isə daha gec baş verdiyini iddia edir. Onun sözlərinə görə, qərar həmin gün sistemə düşsəydi, özünün və vəkilinin telefon nömrələrinə və elektron poçtlarına bildiriş gəlməli idi, amma heç biri bildiriş almayıb. Digər qərarlarla bağlı bildirişlər elektron kabinetdə görünsə də, bu qərara dair bildiriş orada yoxdur.

Jurnalist kassasiya şikayəti üçün vəkillə müqavilə bağlayıb, lakin müddətin ötürüldüyü əsas gətirilərək maneə ilə üzləşdiyini deyir. Babalı “Baku TV” ilə mübahisəni Avropa İnsan Hüquqları Məhkəməsində davam etdirməyi planlaşdırır. O, əvvəllər də “Qafqazinfo.az”, “ATV” və “İki Sahil” qəzetinə qarşı işlərdə çıxarılmış qərarlardan bu məhkəməyə şikayət edib.

Babalı 2023-cü ilin dekabrında “Abzas Media işi” çərçivəsində həbs olunub. 2025-ci il iyunun 20-də Bakı Ağır Cinayətlər Məhkəməsi onu, “Abzas Media”nın direktoru Ülvi Həsənlini, baş redaktoru Sevinc Vaqifqızını və “Azadlıq Radiosu”nun əməkdaşı Fərid Mehralızadəni 9 il, Nərgiz Absalamova və Elnarə Qasımovanı 8 il, Məhəmməd Kekalovu isə 7 il 6 ay azadlıqdan məhrum edib. Jurnalistlər qaçaqmalçılıq da daxil olmaqla ittihamları rədd edir, korrupsiya araşdırmalarına görə cəzalandırıldıqlarını deyirlər.

Digər xəbərlər