Rusiya Ukraynadakı fransız hərbçilərini “qanuni hədəf” adlandırır, Paris onların orada olduğunu təsdiqləyib

Foto: Совет Федерации, CC BY 4.0, Wikimedia Commons
17-11-2026 20:52

Rusiya Xarici İşlər Nazirliyinin rəsmi nümayəndəsi Mariya Zaxarova noyabrın 17-də bildirib ki, Ukraynada olan fransız hərbçilərinə qarşı tədbirləri diplomatlar yox, Rusiya Müdafiə Nazirliyi və Baş Qərargah görəcək. Zaxarova Vladimir Putinin əvvəlki sözlərini xatırladıb: Ukraynada yerləşdirilən xarici qoşunlar Rusiya ordusu üçün “qanuni hədəf” olacaq. “Ümid edirik ki, Parisdə bunu anlayırlar”, - Zaxarova nazirliyin saytında dərc olunan şərhində yazıb.

Mübahisə Fransanın RFI radiosunun noyabrın 16-da yaydığı məlumatdan sonra başlayıb. RFI yazıb ki, fransız hərbçiləri ən azı 2026-cı ilin yayından “Volonté” (“İradə”) adlı əməliyyat çərçivəsində gizli şəkildə Ukraynadadır, döyüşlərə qatılmır, ukraynalı hərbçilərə təlim keçir və hərbi texnikanı təmir edir.

Fransa Silahlı Qüvvələrinin mətbuat katibi Alis Rufo “Le Figaro” qəzetinə hərbçilərin Ukraynada olduğunu təsdiqləyib. Onun sözlərinə görə, missiya “son dərəcə şəraitə bağlı xarakter” daşıyır, hərbçilər cəbhə xəttindən “çox uzaqdadır” və döyüş əməliyyatlarında iştirak etmir. Rufo bildirib ki, bu səbəbdən missiya silahlı müdaxilə sayılmır və parlament ondan əvvəlcədən xəbərdar edilməyib.

Rusiyanın xarici işlər naziri Sergey Lavrov fransız hərbçilərinin missiyasını “artıq Ukraynaya dəstək yox, müharibədə birbaşa iştirak” adlandırıb. Zaxarova isə RFI-ın məlumatının Moskva üçün gözlənilməz olmadığını, Rusiyanın Ukraynada qərbli hərbi mütəxəssis, təlimatçı və muzdluların olduğunu dəfələrlə dediyini bildirib. O, parlamentin xəbərdar edilməməsini də fransız hakimiyyətinin öz vətəndaşlarının fikrinə etinasızlığı kimi tənqid edib.

Fransa Prezidenti Emmanuel Makron 2024-cü ildən bəri Ukraynaya Qərb hərbçilərinin göndərilməsini istisna etməyən bəyanatlar verir. Moskva isə bu müddətdə Ukraynada istənilən xarici hərbi kontingentin hədəfə çevriləcəyini təkrarlayıb. Paris Zaxarovanın son sözlərinə hələlik cavab verməyib.

Digər xəbərlər