İran parlamentinin sədri ABŞ və İsrail bazaları yaxınlığındakı bəndləri və limanları hədəf sayacaqlarını deyir

Foto: khamenei.ir, CC BY 4.0, Wikimedia Commons
17-11-2026 13:39

İran parlamentinin sədri Məhəmməd Bağır Qalibaf noyabrın 17-də “X” sosial şəbəkəsində yazıb ki, ABŞ və ya İsrail hərbi bazası yaxınlığındakı istənilən bənd, liman və elektrik stansiyası bundan sonra İran üçün ikili təyinatlı obyekt sayılacaq. Bu o deməkdir ki, İran ordusu belə mülki infrastrukturu mümkün hədəf kimi görür.

Qalibaf bunu “The New York Times” qəzetinin məqaləsinə cavab olaraq yazıb. Onun iddiasına görə, məqalədə ekspertlər ABŞ-yə İrana növbəti zərbələrdə İranın raket obyektləri yaxınlığındakı bəndləri vurmağı tövsiyə edirlər, çünki həmin bəndlərin həm mülki, həm də hərbi məqsədlə işlədildiyini düşünürlər.

Elə həmin gün İslam İnqilabı Keşikçiləri Korpusu (KSİR) Bəhreyndəki Şeyx İsa aviabazasında yerləşən ABŞ radar stansiyasına zərbə endirdiyini açıqlayıb. KSİR bunu ABŞ dronlarının İran hava məkanını pozmağa davam etməsinə cavab adlandırıb. “Əl-Ərəbiyyə” telekanalının yaydığı məlumata görə, Bəhreyn hava hücumundan müdafiə qüvvələrinin uğurla işlədiyini bildirib.

İran ordusunun sözçüsü briqada generalı Məhəmməd Əkrəminiya isə ticarət gəmilərini Hörmüz boğazında “saxta Amerika marşrutlarından” istifadə etməməyə çağırıb. Onun sözlərinə görə, boğazda “dəniz minaları, yanğın və partlayış” təhlükəsi qalır.

Bu açıqlamalar ABŞ və İsrail ilə İran arasında davam edən müharibə fonunda səslənir.

Digər xəbərlər