Azərbaycanın elektrik ixracı doqquz ayda üç dəfədən çox azalıb, İrana satış isə 52,8 faiz artıb
Dövlət Statistika Komitəsinin məlumatına görə, Azərbaycan 2026-cı ilin yanvar-sentyabr aylarında Rusiya, Gürcüstan və İrana 341,1 milyon kilovat-saat elektrik enerjisi ixrac edib. İxracın dəyəri 17,6 milyon dollar olub; bu, ötən ilin eyni dövrü ilə müqayisədə dəyərcə 3,1 dəfə, həcmcə 2,8 dəfə azdır.
İrana ixrac isə artıb: doqquz ayda bu ölkəyə 36,6 milyon kilovat-saat, təxminən 1,04 milyon dollarlıq elektrik satılıb. Bu, həm həcmcə, həm də dəyərcə ötən ilin eyni dövründən 52,8 faiz çoxdur. Eyni dövrdə Azərbaycan İrandan 28,5 milyon kilovat-saat elektrik alıb, idxal təxminən 31 faiz artıb.
Azərbaycanın üç qonşu ölkədən elektrik idxalı doqquz ayda 161 milyon kilovat-saat, 7,9 milyon dollar olub. Bu, ötən illə müqayisədə dəyərcə 33 faiz, həcmcə 20 faiz çoxdur. Beləliklə, elektrik ixracından gələn gəlir idxala xərclənən məbləğdən cəmi iki dəfə çoxdur.
Ölkədə elektrik istehsalı da azalıb. Yanvar-sentyabrda 20 milyard kilovat-saat elektrik istehsal olunub, bu, ötən ilin eyni dövründən 2,3 faiz azdır. İstilik elektrik stansiyalarında istehsal 9,5 faiz azalaraq 15,2 milyard kilovat-saata düşüb, su elektrik stansiyalarında isə istehsal artaraq 2,7 milyard kilovat-saata çatıb.