Xarkov rəsmiləri: Rusiyanın tibb müəssisəsinə zərbəsi nəticəsində 62 nəfər yaralanıb, 226 xəstə təxliyə edilir

Xarkovun meri İhor Terexov bildirib ki, Rusiya qoşunları noyabrın 3-nə keçən gecə şəhəri ballistik raketlər və idarəolunan aviabombalarla vurub, zərbələrdən biri tibb müəssisəsinə düşüb.

Xarkov Vilayət Administrasiyasının rəhbəri Oleh Sinehubov zərbənin Nemışlyan rayonunda tibb müəssisəsinin korpusları arasındakı keçidə dəydiyini deyib. Onun sözlərinə görə, 62 nəfər xəsarət alıb, 226 xəstə başqa xəstəxanalara aparılır.

Rusiya həmin gecə Dnepr şəhərini də vurub. Dnepropetrovsk Vilayət Administrasiyasının rəhbəri Oleksandr Hanja zədələnmiş yaşayış binasının fotolarını yayıb, 5 nəfərin yaralandığını, onlardan ikisinin vəziyyətinin ağır olduğunu yazıb.

Bir gün əvvəl Zaporojye vilayətinin Kamışevaxa qəsəbəsinə endirilən zərbə nəticəsində ölənlərin sayı da artıb. Ukrayna Fövqəladə Hallar Xidməti əvvəlcə 24 ölü olduğunu demişdi, Zelenski isə azı 26 nəfərin öldüyünü yazıb. Onun sözlərinə görə, ilk zərbədən sonra humanitar yardım paylanan və insanların sığındığı məktəbə daha doqquz bomba atılıb. Rusiya hərbçiləri bu zərbəni hələlik şərh etməyib.

Zərbələr Rusiya, Ukrayna və ABŞ nümayəndələrinin Əbu-Dabidə noyabrın 10-11-nə planlaşdırılan danışıqlarından bir həftə əvvələ düşür.