"Azenco"nun mühakimə olunan sabiq rəhbəri: Şirkət "Azərenerji"nin keçmiş prezidentinindir, vəkil isə ona ayda 55 min manat yazıldığını deyir

"Azenco" ASC-nin vəsaitindən 3 milyon yarım manatdan çoxunu mənimsəməkdə ittiham olunan sabiq rəhbəri Vüqar Əliyev Bakıda məhkəmə iclasında şirkətin əsas qərarlarını "Azərenerji"nin keçmiş prezidenti Etibar Pirverdiyevin verdiyini deyib. "Azadlıq Radiosu"nun noyabrın 2-dəki prosesdən hazırladığı reportaja görə, Əliyev şirkətin hansı tenderlərdə iştirak edəcəyinə öz aralarında "şef" adlandırdıqları Pirverdiyevin qərar verdiyini bildirib.

Əliyev hələ istintaq dövründə Pirverdiyevin şahid kimi dindirilməsini istəyib. Onun sözlərinə görə, "Azenco" faktiki olaraq Pirverdiyevin şirkətidir: "Hamı bilir ki, bu şirkət Etibar Pirverdiyevindir. Mən bu şirkətdə iki il işləyəndən sonra o, məni rəhbər təyin etdi".

55 min manatlıq maaş iddiası şirkətin indiki sədri Pərviz Hacıyevin dindirilməsi zamanı səslənib. Əliyevin vəkili Pirverdiyevin vəzifəsini soruşub, Hacıyev "məsləhətçi" cavabını verib. Bundan sonra vəkil soruşub: "Sıradan məsləhətçiyə 55 min manat maaş verirdilər? Məsləhətçi şirkətin İdarə Heyətinin sədrindən çox alırdı?"

Hacıyev isə bütün maliyyə məsələlərinin Əliyevin sərəncamında olduğunu iddia edib. Onun sözlərinə görə, Özbəkistanla 16 milyonluq müqavilə sonradan 8 milyona endirilib, hesabatlarda isə gül mağazasından bir gündə 15 min manatlıq gül və 44 min 900 manatlıq içki alınması kimi xərclər olub. Əliyevin vəkili şirkətin hesabına Hacıyevin özünə də "iPhone" telefon alındığını, bunun Əliyevin üzərinə mənimsəmə kimi yazıldığını xatırladıb.

"Azenco"nun nümayəndəsi prosesin qapalı keçirilməsini yenə istəsə də, hakimlər vəsatəti təmin etməyib. Məhkəmə Əliyevin ev dustaqlığına buraxılması barədə vəsatəti də rədd edib.