Qafqazinfo saytı: Avropa Məhkəməsi AXCP sədri Əli Kərimlinin Azərbaycana qarşı şikayəti üzrə tələbləri rədd edib

Avropa İnsan Haqları Məhkəməsinin Azərbaycan Xalq Cəbhəsi Partiyasının sədri Əli Kərimlinin Azərbaycana qarşı 33395/26 nömrəli şikayəti üzrə tələbləri rədd etdiyi deyilir.

Qafqazinfo saytı xəbər verir ki, Kərimli istintaq dövründə, o cümlədən istintaq təcridxanasında hüquqlarının pozulduğunu deyərək məhkəməyə müraciət edib. Saytın yazdığına görə, məhkəmə ərizəçinin və vəkillərinin təqdim etdiyi materialları araşdırıb, tələbləri rədd edib və Məhkəmə Reqlamentinin 39-cu qaydası üzrə Azərbaycana qarşı müvəqqəti tədbir görməmək qərarına gəlib. Bu qayda ölkələrdən təcili tədbir görülməsini istəmək üçün tətbiq olunur.

Kərimli və partiyanın Rəyasət Heyətinin üzvü Məmməd İbrahim hakimiyyəti zorla ələ keçirməyə yönələn hərəkətlərdə ittiham olunurlar. Hər ikisi ittihamı rədd edir.

Noyabrın 3-də Bakı Ağır Cinayətlər Məhkəməsində hakim Vüqar Quliyevin sədrliyi ilə keçirilən hazırlıq iclasında iş baxışa verilib, növbəti iclas noyabrın 13-nə təyin olunub. AXCP "Kavkazski uzel" nəşrinə açıqlamasında iclasın "yuxarıdan verilən göstəriş əsasında" qapalı keçirildiyini bildirib. Partiyanın sözlərinə görə, Kərimli növbəti iclaslar da qapalı olarsa, prosesdə iştirakdan imtina edəcəyini deyib.

Demokratik Qüvvələrin Milli Şurasının sədri Cəmil Həsənli eyni nəşrə deyib ki, Ramiz Mehdiyevin işi Kərimlinin təqibi üçün zəmin yaradıb. Həsənli Prezident Administrasiyasının sabiq rəhbərinin məhkəməsinin 31 günə bitdiyini, ona şərti cəza verildiyini xatırladıb. "Əgər Mehdiyev və Kərimli birlikdə hərəkət ediblərsə, onlar eyni məhkəmə prosesində ifadə verməli, sualları cavablandırmalı idilər", - o bildirib.