Maliyyə naziri: Dövlət Neft Fondu qızılın unsiyası 5 min dolları keçəndən sonra ehtiyatın bir hissəsini satıb

Maliyyə naziri Sahil Babayev Dövlət Neft Fondunun qızılın unsiyası 5 min dolları keçəndən sonra ehtiyatının bir hissəsini satdığını deyib. O, bunu Milli Məclisin İqtisadi siyasət komitəsində 2027-ci il büdcəsinin müzakirəsində bildirib və qərarı "müdrik" adlandırıb.

Nazirin sözlərinə görə, iki il əvvəl heç kim qızılın 5,5 min dollara çatacağını, sonra 3,8 min dollara enəcəyini dəqiq proqnozlaşdıra bilməzdi. Babayev deyir ki, Fond satışla qiymət artımından gələn gəliri faktiki qeydə alıb. O, bütün qızılın satılmamasını isə qiymətin daha da düşəcəyinə əminlik olmaması və yeni geosiyasi münaqişələrin qızılı yenidən bahalaşdıra bilməsi ilə izah edib.

Büdcə layihəsinə görə, Fondun aktivləri 2026-cı ildə təxminən 74-75 milyard dollar ətrafındadır, baza ssenarisində isə 2030-cu ildə 78,3 milyard dollara çatacaq. Neft qiymətindən asılı olaraq bu rəqəm 70,3-86,3 milyard dollar arasında dəyişə bilər.

Layihədə deyilir ki, büdcəyə transfertlərin azaldılması hesabına Fondun aktivləri neftin qiymətinin əlverişsiz olduğu ssenarilərdə belə qorunacaq.