Bakıda üç nəfərin öldüyü yanğın işi: Klinika direktoru məhkəmədə zərərçəkmişdən üzr istəyib, özünü günahkar saydığını deyib

Bakı Ağır Cinayətlər Məhkəməsində 2025-ci ilin noyabrında Yasamal rayonundakı yaşayış binasında baş verən yanğın işi üzrə proses keçirilib. Təqsirləndirilən "Loft Dent" stomatoloji klinikasının direktoru Bəhruz Paşayev zərərçəkmişdən üzr istəyib, aldadıldığını və özünü günahkar saydığını deyib, onu bağışlamasını xahiş edib.

APA-nın məhkəmə reportajına görə, yanğında həyatını itirən Könül Vəlibəylinin qızı Ləman Qulamova ifadəsində hadisə zamanı evdə olduğunu, birinci mərtəbəyə düşəndən sonra özünü itirdiyini bildirib. "10 gün komada qalmışam. Komadan ayılandan sonra 11 ay müalicə olunmuşam. Vəziyyətim indi də yaxşı deyil", - deyib.

Zərərçəkmiş kimi tanınan Fatimə Məmmədova yanğın zamanı yıxılaraq ayağının sındığını, təqsirləndirilən şəxsi tanımadığını və şikayətçi olduğunu bildirib. Vüqar Babaxanov isə bacısı ilə evdə olduğunu, qapını açanda tüstüdən göz-gözü görmədiyini, anasının onlara balkona çıxmağı dediyini danışıb.

Yanğın 2025-ci il noyabrın 21-də Mirəli Seyidov küçəsindəki çoxmərtəbəli binada baş verib. Hadisədə 2018-ci il təvəllüdlü uşaq da daxil olmaqla üç nəfər ölüb, 25 nəfər xəsarət alıb. Klinika binanın birinci və zirzəmi mərtəbələrində yerləşirdi.

İstintaq Paşayevin yanğın təhlükəsizliyi qaydalarına riayət etmək vəzifəsini pozduğunu iddia edir. Ona Cinayət Məcəlləsinin 225.3-cü maddəsi ilə ittiham elan olunub, barəsində həbs qərarı seçilib.