Kreml Ukraynanın Trampın istəyinə məhəl qoymadan Rusiyanın neft zavodlarını yenidən vurduğunu deyir

Kreml rəsmiləri Ukraynanın Rusiya neft emalı zavodlarına hücumları cümə günü bərpa etdiyini və Kiyevin ABŞ-nin istəklərinə "sadəcə məhəl qoymadığını" deyirlər. Rusiya dövlət mediası Kstovodakı yanğından az əvvəl Samara vilayətində "Rosneft" şirkətinə məxsus böyük zavodun da vurulduğunu bildirir.

"The Wall Street Journal" qəzeti əvvəlcə Ukraynanın Ağ Evin təzyiqi ilə Rusiyanın enerji obyektlərini vurmağı dayandırdığını yazmışdı. Ukrayna rəsmiləri isə "Kyiv Independent" qəzetinə deyiblər ki, Trampın kürəkəni Cared Kuşnerin zərbələrə 30 gün ara vermək tələbini heç vaxt qəbul etməyiblər.

Tramp yanacaq qiymətlərinin artımında Zelenskini günahlandırır, ötən ay isə Rusiya dizel yanacağına qoyulan ABŞ sanksiyalarını ləğv edib. "The Guardian" qəzeti yazır ki, Zelenskinin zavodlara zərbələrdən danışmaması görünür, ABŞ-nin qəzəbinə səbəb olmamaq üçündür.

Zelenski bunun əvəzinə Ukrayna ordusunun Rusiyanın Rostov vilayətində raket istehsal edən müəssisəni vurduğunu və "Pantsir" sistemini məhv etdiyini deyib. Onun sözlərinə görə, Rusiya gecə dörd vilayətə zərbə endirib, yüz minlərlə ailə işıqsız qalıb, Kiyevdə isə istilik elektrik stansiyasının zədələnməsi səbəbindən işıq 8-10 saatlıq kəsilib.

Ukrayna Prezidenti oktyabrda Rusiya ordusunun 54 400 ölü və yaralı verdiyini, bunun müharibənin başlanğıcından bəri ən yüksək aylıq göstərici olduğunu da iddia edib. Zelenskinin sözlərinə görə, Ukrayna ötən ay 96,2 kvadrat kilometr ərazini geri alıb ki, bu da Rusiyanın tutduğundan 10,4 kvadrat kilometr çoxdur.