Dohada İranın 6 milyard dollarlıq aktivləri müzakirə olunur: Hörmüz boğazının açılması buna bağlı ola bilər

Qətərin vasitəçiliyi ilə Dohada ABŞ və İran arasında dolayı danışıqlar bazar günü üçüncü günə keçib. Söhbət İranın 6 milyard dollardan çox aktivinin azad edilməsindən gedir ki, bu da Hörmüz boğazının açılmasına və İranın nüvə proqramı üzrə danışıqların bərpasına yol aça bilər.

"The Guardian" qəzeti yazır ki, Qətər ABŞ-nin sanksiyaları qaldırması, İranın isə boğazı açıb nüvə danışıqlarına başlaması prosesini qısaltmağa çalışır və Tehran bu müddətin yeddi gündən iki günə endirilməsinə razılaşıb. Qəzetin məlumatına görə, Körfəz ölkələrinin rəsmiləri İranın təklifinə ABŞ-nin cavabını gözləyir.

BƏƏ nümayəndəsi Ənvər Qərqaş yeni gərginliyin nə İranın, nə də qonşularının xeyrinə olduğunu deyib. "Əvvəllər göstərdiyimiz kimi, ən pisinə də hazırıq", - o bildirib.

Danışıqlar cümə günü Hörmüz boğazı yaxınlığında naməlum raketlərin Pakistana gedən Qətər qaz tankerini vurmasına baxmayaraq davam edir. Qəzetə görə, gəmi hücumdan bir neçə saat əvvəl Tehrandan təhlükəsiz keçid icazəsi almışdı.

İran Xarici İşlər Naziri Abbas Əraqçi ABŞ-nin "digər yollardansa diplomatiyanı" seçəcəyinə ümid etdiyini, amma birbaşa danışıqlar planlaşdırılmadığını deyib. Nazir Doha görüşlərində iştirak etmir, bazar ertəsi Türkmənistana gedəcək.