İranın yüksək rütbəli generalı Hörmüz üzərində suverenliyin tanınmasını tələb edir, SEPAH daha üç tankerin minaya düşdüyünü deyir

İran silahlı qüvvələrinin Baş Qərargah rəisi və "Xatəm əl-Ənbiya" Mərkəzi Qərargahının komandanı kimi təqdim olunan general-mayor Əli Abdullahi deyib ki, regionda təhlükəsizlik üçün şərtlərdən biri "İranın Hörmüz boğazı üzərində suverenliyinin rəsmən tanınmasıdır". Onun müraciətini İranın "Tasnim" agentliyi yayıb.

Abdullahinin sadaladığı digər şərtlər sanksiyaların tam ləğvi, dondurulmuş aktivlərin açılması, müharibə ziyanının ödənilməsi, hücumun təkrarlanmayacağına dair təminat və "Qərbi Asiyada təhlükəsizlik sisteminin regionun öz dövlətləri tərəfindən yaradılmasıdır".

İslam İnqilabı Keşikçiləri Korpusunun (SEPAH) Hərbi Dəniz Qüvvələri isə həmin gün bildirib ki, səhərdən bəri Hörmüz boğazının "qanunsuz marşrutu"nda üç neft tankeri minaya düşərək partlayıb, gəmilər boğazın cənub sahillərində yanır. Qurumun iddiasına görə, tankerlər naviqasiya sistemlərini söndürüb, ABŞ ordusu ilə əməkdaşlıq ediblər.

SEPAH bir gün əvvəl oktyabrın 25-dən bəri boğazda 11 tankerin alova büründüyünü demişdi. ABŞ Mərkəzi Komandanlığının rəhbəri Bred Kuper isə oktyabrın 25-də əsas gəmiçilik yollarının minalardan təmizləndiyini bildirmişdi.

Bu açıqlamalar ABŞ-nin noyabrın 2-si gecə İranın Qeşm adasına zərbələrindən sonra verilib. ABŞ və İsrail fevralın 28-də İrana hücum edəndən sonra boğaz faktiki bağlanıb, neft və qaz qiymətləri qalxıb. Qətərin vasitəçilik cəhdləri isə davam edir. Reuters agentliyinə danışan rəsmiyə görə, İran heyəti bazar günü Dohadan ayrılıb, amma razılaşma layihəsi hələ də müzakirə olunur.