DİN: Ukraynadan azərbaycanlılara zəng edib pul ələ keçirən şəbəkənin 11 üzvü saxlanılıb Azərbaycana gətirilib

Daxili İşlər Nazirliyi Ukrayna polisi ilə birgə əməliyyat nəticəsində Kiyevdə qanunsuz zəng mərkəzlərində işləyən 11 nəfərin saxlanılıb Azərbaycana gətirildiyini bildirib. Nazirliyin şəbəkənin təşkilatçıları kimi adlarını çəkdiyi Nəriman İskəndərov, Elsun Əliyev, Elşad Musayev və Elşən Şükürov beynəlxalq axtarışda olublar.

Nazirliyin məlumatına görə, zəng mərkəzləri Ukraynanın bir neçə şəhərində xidmət ofisi adı altında işləyib. İşçilər "Telegram"da yüksək maaş vəd edən informasiya texnologiyaları və müştəri xidməti elanları ilə cəlb olunub.

Nazirlik bildirir ki, zəng edənlər vətəndaşlara hesablarında şübhəli əməliyyat aparıldığını, kartlarının bloklanacağını deyib, onları pulu "təhlükəsiz hesaba" köçürməyə, kart məlumatlarını və SMS kodlarını açıqlamağa sövq ediblər. Bəzi hallarda isə saxta investisiya təklifindən istifadə olunub.

Cinayət işi başlanıb, dəstə başçıları barəsində həbs qərarı seçilib, digər saxlanılanlarla bağlı istintaq davam edir.