"Bank Respublika" "AccessBank"ı almağı başa çatdırıb, birləşmədən sonra bank yalnız "Bank Respublika" adı ilə işləyəcək

"Bank Respublika" və "AccessBank" sövdələşmənin başa çatdığını açıqlayıb. "Bank Respublika" "AccessBank"ın səhmlərinin 100 faizini alıb, "AccessBank"ın əvvəlki səhmdarları isə "Bank Respublika"nın yeni buraxılan imtiyazlı səhmlərini əldə edib. Sentyabrda verilən məlumata görə, bu səhmlər "Bank Respublika"nın nizamnamə kapitalının 25 faizini təşkil edir, satıcılar beynəlxalq maliyyə institutlarıdır, sövdələşmənin qiyməti isə açıqlanmayıb.

Növbəti mərhələdə banklar hüquqi və əməliyyat baxımından birləşəcək, yeni bank "Bank Respublika" adı altında işləyəcək. Banklar bu yolla "Azərbaycanın ən böyük banklarından biri"nin yaranacağını bildirir. O vaxta qədər müştərilərə hər iki bank öz adı ilə xidmət göstərəcək.

"AccessBank"ın İdarə Heyətinə "Bank Respublika"nın əvvəlki sədri Tariyel İsmayılov rəhbərlik edir, o, sonra birləşmiş bankın İdarə Heyətinin sədri olacaq. "Bank Respublika"nın İdarə Heyətinin sədri vəzifəsini müvəqqəti olaraq sədr müavini Aslan Abbasov icra edir.

"Bank Respublika"nın Müşahidə Şurasının sədri Şakir Rəhimov sövdələşməni "Azərbaycanda əlverişli investisiya mühitinin, bank sektorunun dayanıqlılığının və beynəlxalq investorların onun perspektivlərinə etimadının göstəricisi" adlandırıb.