ABŞ İranın Qeşm adasına zərbə endirib, rəsmilər bunu "müdafiə" adlandırır, amerikan qəzeti isə həftələrdir gizli zərbələr endirildiyini yazır

ABŞ noyabrın 2-si axşam İranın Hörmüz boğazının girişində yerləşən Qeşm adasına zərbələr endirib. İranın dövlət agentliyi IRNA adada ardıcıl partlayışlar olduğunu, şahidlərin adanın üzərində iki təyyarə gördüyünü yazıb. Yarımrəsmi Fars agentliyi Bəndər-Lengə liman şəhərində də dəniz tərəfdən partlayış səsləri eşidildiyini bildirib.

"The Wall Street Journal" qəzeti ABŞ rəsmilərinə istinadən yazır ki, bu zərbə son həftələrdə ictimaiyyətə açıqlanmayan əməliyyatlar silsiləsinin bir hissəsidir. Rəsmilərdən biri kampaniyanın böyük döyüşlərə qayıdış siqnalı verməmək üçün gizli saxlandığını deyib. Qəzetin yazdığına görə, adada böyük yeraltı raket kompleksi, hərbi dəniz bazası və suşirinləşdirmə zavodu var.

ABŞ rəsmiləri Azadlıq Radiosuna məhdud zərbələr endirildiyini təsdiqləyib, bunu İranın ABŞ təyyarəsinə atəş açmasına cavab və "müdafiə" addımı kimi təqdim edib. "Associated Press" agentliyinin danışdığı rəsmi hədəfin amerikan vasitələrinə "yer-hava" raketləri ilə atəş açan iranlılar olduğunu deyib. Həmin gün İran Keşikçilər Korpusu Qeşmin cənubunda iki ABŞ dronunu ələ keçirdiyini və boğazın şərqində bir MQ-9 dronunu məhv etdiyini açıqlamışdı.

Prezident Donald Tramp isə noyabrın 2-də aralıq seçkilərindən sonra İrana zərbə endiriləcəyini soruşan jurnalistlərə "xeyr" cavabını verib. "Fox News" telekanalında o, müharibəyə xərclənən 30 milyard dolları xırda məbləğ adlandırıb, ABŞ-nin Venesuelada qat-qat çox qazandığını deyib və İranla sövdələşmə şansının yüksək olduğunu iddia edib. "The Wall Street Journal" qəzetinin danışdığı administrasiya rəsmiləri prezidentin hərbi variantları hələ də nəzərdən keçirdiyini bildirir.

"Obsidian Risk Advisors" şirkətinin analitiki Brett Erikson Azadlıq Radiosuna deyib ki, bu zərbələr "odla oynamaqdır", amma son həftələrin məhdud toqquşmalarından ciddi fərqlənmir və Tehranın strateji xəttini dəyişəcəyinə əsas görmür.

Eyni gün Oman sahillərində 14 hindistanlı dənizçinin olduğu "MSV Al Jusufi" yük gəmisi vurulub. Hindistanın gəmiçilik naziri Sarbananda Sonoval gəminin "naməlum hava obyekti" tərəfindən vurulduğunu, bir dənizçinin öldüyünü, 13 nəfərin isə xilas edildiyini yazıb. Nazir zərbəni kimin endirdiyini deməyib.