İranın təhlükəsizlik şurasının katibi: ABŞ yenidən hücum etsə, Avropadakı Amerika bazalarını da vura bilərik

Foto: Hoseyn 1 at Persian Wikipedia, CC BY-SA 3.0, Wikimedia Commons
11-11-2026 18:30

İranın Ali Milli Təhlükəsizlik Şurasının katibi Möhsün Rzai ABŞ İrana yenidən hücum edərsə, Tehranın təkcə yaxın regiondakı yox, Avropadakı Amerika hərbi bazalarını da hədəfə ala biləcəyini deyib. O, ABŞ qüvvələrini yerləşdirən ölkələrə hücumda əməkdaşlıq etməməyi tövsiyə edib: “Amerika təyyarələri haradan qalxsa, onu özümüzə qarşı təhdid sayacağıq”.

Rzai bu sözləri Beyrutda yerləşən “Al Mayadeen” telekanalına müsahibəsində deyib: “Amerikalılar səhv edib bizə hücum etsələr, özümüzü yaxındakı bazalarla məhdudlaşdırmayacağıq. Hətta Avropa ölkələrindəki bəzi Amerika hərbi bazalarını da hədəfə ala bilərik”. Onun sözlərinə görə, İran raketlərinin çata bilmədiyi düşünülən “bəzi adalar” da hədəf ola bilər.

Rzai həmçinin deyib ki, Kremldə görüşdükləri zaman Vladimir Putin ona amerikalılara İslam Respublikasının “devrilə bilən sistem olmadığını” bildirdiyini söyləyib. Kremlin bu sözlərə münasibəti açıqlanmayıb.

Bundan əvvəl İranın sərt xətli “Keyhan” qəzeti Kipr, Yunanıstan, Rumıniya, Albaniya, İtaliya və Britaniyadakı ABŞ və NATO obyektlərini, eləcə də Hind okeanındakı Dieqo-Qarsiya bazasını mümkün hədəflər kimi sadalamışdı. Vaşinqtondakı Strateji və Beynəlxalq Araşdırmalar Mərkəzinin (CSIS) məlumatına görə, İranın əsas ballistik raketlərinin uçuş məsafəsi təxminən 2 min kilometrdir, bəzi variantları 3 min kilometrə çata bilər.

Eyni müsahibədə Rzai ABŞ ilə danışıq aparılmadığını, Hörmüz boğazının İranın yeddi şərti yerinə yetirilənə qədər bağlı qalacağını deyib. Onun sözlərinə görə, bu şərtlərin birincisi bütün cəbhələrdə, xüsusilə Livanda müharibənin dayandırılmasıdır. Boğazın bağlı qalması dünya neft bazarına, o cümlədən Azərbaycan neftinin qiymətinə birbaşa təsir edir.

Digər xəbərlər