Putin ukraynalıları “tarixin doğru tərəfinə”, yəni Rusiyanın tərəfinə keçməyə çağırıb

Foto: Пресс-служба Президента России, CC BY 4.0, Wikimedia Commons
20-11-2026 16:00

Rusiya prezidenti Vladimir Putin ukraynalılara “bizim tərəfə keçin” çağırışı edib. O, bu tərəfi “ümumi” və “tarixin doğru tərəfi” adlandırıb. Putin bunu serb rejissoru Emir Kusturitsaya Rusiya Pravoslav Kilsəsinin başçısı patriarx Kirillin 80 illiyinə həsr olunan sənədli film üçün verdiyi müsahibədə deyib; müsahibədən hissələri TASS agentliyi yayıb.

“Ukraynalılardan danışsaq, istərdim bunu eşitsinlər. Nə baş versə də, bu gün hansı faciələr baş versə də, gələcəyi düşünmək lazımdır”, - deyən Putin güclü olmaq üçün birlikdə olmağın vacib olduğunu söyləyib.

“Vedomosti” qəzetinin yazdığına görə, Putin bunun mütləq Rusiya ilə Ukraynanın bir dövlətdə birləşməsi demək olmadığını da qeyd edib.

Putin müharibənin ilk günlərində də ukraynalılara müraciət etmişdi. O vaxt Ukrayna hərbçilərini silahı yerə qoymağa, sonra isə hakimiyyəti ələ almağa çağırmışdı.

Müsahibə Rusiyanın Ukraynaya yeni kütləvi hava hücumu etdiyi gün yayılıb. Gecə endirilən dron və ballistik raket zərbələrində ən azı 9 nəfər ölüb, 28 nəfər yaralanıb, Kiyevdə zədələnən körpülər qismən bağlanıb. Polşa da rus raketlərinin hava məkanını pozduğunu bildirib.

Digər xəbərlər