Paşinyan: Ermənistan 2027 və ya 2028-ci ildə Aİ-yə üzvlük üçün müraciət edə bilər, Aİ-də və Avrasiya İttifaqında eyni vaxtda qalmaq mümkün deyil

Ermənistanın Baş naziri Nikol Paşinyan noyabrın 3-də Brüsseldə "Euronews" telekanalının təşkil etdiyi Aİ-nin genişlənməsi sammitində deyib ki, ölkəsinin Avropa İttifaqına tamhüquqlu üzvlük üçün rəsmi müraciəti 2027 və ya 2028-ci ildə real ola bilər. Onun sözlərinə görə, Yerevan belə müraciətə gətirib çıxaracaq prosesə artıq başlayıb.

Paşinyan Aİ-yə üzvlüyü demokratiyanın qorunması baxımından strateji seçim adlandırıb və ölkənin gələcək istiqamətini ermənilərin özünün müəyyən etməli olduğunu deyib. Ermənistan hələlik rəsmi müraciət təqdim etməyib; ölkə hazırda Avropa Komissiyası ilə viza liberallaşdırılması dialoqu aparır və bu prosesin 2029-cu ilədək başa çatması nəzərdə tutulur.

"Euronews"a müsahibəsində Paşinyan Aİ-də tamhüquqlu üzvlüklə Rusiyanın rəhbərlik etdiyi Avrasiya İqtisadi İttifaqında indiki şərtlərlə iştirakın bir-biri ilə uzlaşmadığını, xüsusən gömrük tənzimlənməsində ziddiyyətlər olduğunu deyib. "Bir məqamda Ermənistan seçim etməli olacaq", - o bildirib və hökumətin vəzifəsini insanların hər iki yolun açdığı imkanları anlayaraq qərar verə bilməsi üçün real alternativ yaratmaq kimi izah edib.

Paşinyan sammitdə Azərbaycanla sülhə də toxunub. O deyib ki, Bakı ilə Yerevan arasında Vaşinqtonda əldə olunan razılaşmalar real cizgilər alıb, indi onları institusionallaşdırmaq vacibdir. Onun sözlərinə görə, Ermənistanın Azərbaycanla artıq ikitərəfli ticarəti var və tərəflər "Tramp marşrutu" (TRIPP) layihəsini həyata keçirmək niyyətindədir.

Ermənistanın Baş naziri Cənubi Qafqazı fərqlərə baxmayaraq ümumi maraqları olan vahid region kimi gördüyünü deyib. Onun fikrincə, Azərbaycanla sülh, TRIPP və Gürcüstan, Ermənistan və Azərbaycanın xüsusilə logistika sahəsində əməkdaşlığı qlobal təchizat zəncirlərindəki böhranı aşmağa imkan yaradır və region "beynəlxalq arenada tamamilə yeni mövqe" tuta bilər.

Azərbaycan və Ermənistan sülh sazişinin mətnini 2025-ci ilin avqustunda Vaşinqtonda paraflayıb, amma saziş hələ imzalanmayıb: Bakı imzalanmanı Ermənistan Konstitusiyasında ərazi iddiası saydığı müddəaların çıxarılması ilə şərtləndirir.