Ermənistanda müxalifətçi milyarderin və deputat qardaşı oğlunun evlərində axtarış aparılır, istintaq 65 ünvanı əhatə edir

Noyabrın 4-də səhərdən Ermənistan İstintaq Komitəsi "Taşir" şirkətlər qrupunun rəhbəri, müxalifətdəki "Güclü Ermənistan" partiyasının lideri Samvel Karapetyanın və onun qardaşı oğlu, parlamentdəki fraksiyanın rəhbəri Narek Karapetyanın evlərində axtarış aparır. Partiyanın sözçüsü Aqavni Sukiasyan axtarışların ailə ilə bağlı digər ünvanlarda da getdiyini yazıb.

İstintaq Komitəsi bildirir ki, İqtisadi Cinayətlərin və Qaçaqmalçılığın İstintaqı üzrə Baş İdarənin apardığı cinayət işi üzrə 65 ünvanda eyni vaxtda axtarış keçirilir. Mediada işin "Ermənistan Elektrik Şəbəkələri" şirkəti ilə bağlı iqtisadi cinayətlə əlaqəli olduğu deyilir.

"Güclü Ermənistan" partiyası yeni axtarış və həbslərə Baş nazir Nikol Paşinyanın qorxudan əmr verdiyini iddia edir.

Rusiyada biznes quran Samvel Karapetyan 2025-ci ilin iyununda Erməni Apostol Kilsəsini müdafiə edən çıxışından sonra barəsində cinayət işi açılıb, hazırda ev dustaqlığındadır. Ona konstitusiya quruluşunu devirməyə çağırış və iqtisadi ittihamlar irəli sürülüb.

Narek Karapetyan 2026-cı il iyunun 7-də keçirilən parlament seçkilərində blokun siyahısına başçılıq edib. Onun evində iyulun 31-də də axtarış aparılıb. Ona pulların yuyulmasında və insanlara mitinqlərə gəlmək üçün pul verməkdə ittiham irəli sürülüb, o, bunu siyasi təqib adlandırır.