Zelenski: ABŞ Putinin tələb etdiyi Donbasdan çıxma müqabilində Ukraynanın NATO-ya üzvlüyünü ilk dəfə gündəmə gətirib
Foto: Press Service of the President of Ukraine, CC BY 4.0, Wikimedia CommonsUkrayna prezidenti Volodimir Zelenski deyib ki, ABŞ danışıqçıları ilk dəfə Ukraynanın Donbasda nəzarətində qalan ərazilərdən qoşunlarını çıxarması müqabilində NATO-ya qəbul olunması ideyasını soruşublar. Rusiya bu ərazilərdən Ukrayna qoşunlarının çıxarılmasını sülhün şərti kimi tələb edir, eyni zamanda Ukraynanın NATO-ya üzvlüyünə qarşı çıxır.
“Amerikalılar sual verdilər: Ukrayna NATO-ya daxil olsa, Donbasdan çıxarmı? Bu, ilk dəfə idi ki, gündəmə gəldi”, - Zelenski jurnalistlərə deyib. Onun sözlərinə görə, hələlik konkret təklif yoxdur və Ukrayna qoşunlarını çıxarmaq fikrində deyil, amma möhkəm təhlükəsizlik zəmanəti, ordusunun ölçüsünə məhdudiyyət qoyulmaması və bərpa üçün vəsait təklif olunsa, məsələni referenduma çıxara bilər.
Zelenski bunun “NATO-nun yenidən gündəmə qayıtması” demək olduğunu, lakin Putinin siqnallarını nəzərə alanda “son dərəcə çətin söhbət” olduğunu bildirib. ABŞ rəsmiləri əvvəllər Ukraynanın NATO-ya üzvlüyünün müzakirə mövzusu olmadığını deyirdilər. Trampın elçiləri Stiv Uitkoff və Cared Kuşner bu həftə əvvəl Moskvada Putinlə, sonra Dublində Zelenski ilə görüşüblər.
Moskva sülh şərti kimi Ukrayna ordusunun sayının məhdudlaşdırılmasını, ərazi güzəştlərini və Ukraynanın neytral status almasını tələb edir. Rusiya hazırda Donetsk və Luqansk vilayətlərinin böyük hissəsi də daxil olmaqla Ukrayna ərazisinin təxminən beşdə birini nəzarətdə saxlayır. Zelenski konstitusiyaya neytrallıq statusu yazılmasını da rədd edib.
Döyüşlər isə davam edir. Rusiya rəsmilərinin məlumatına görə, Belqorod vilayətinin Proletarski qəsəbəsində Ukrayna dronunun evə zərbəsi nəticəsində ər-arvad və onların iki yaşlı qızı ölüb. Ukrayna Hərbi Hava Qüvvələri isə Rusiyanın gecə 96 dron buraxdığını, onlardan 81-nin vurulduğunu bildirib.
Eyni gündə Bolqarıstanın Baş naziri Rumen Radev büdcə kəsiri və silah ehtiyatlarının azlığını əsas gətirərək Ukraynaya maliyyə və hərbi yardımı dayandırdığını açıqlayıb. Bolqarıstan mediasının yazdığına görə, Radev Aİ səviyyəsində başqa ölkələrin Ukraynaya yardımını bloklamayacaqlarını da deyib. Bir gün əvvəl Polşa da Ukrayna üçün ABŞ silahlarının alınmasına pul verməyi dayandırdığını açıqlamışdı.


