Tramp Rusiya ilə Ukraynanın sazişə hazır olduğunu deyir, Ukrayna danışıqçıları bu nikbinliyi bölüşmür
Arxiv foto: Benjamin D Applebaum, Public domain, Wikimedia CommonsABŞ prezidenti Donald Tramp Rusiya və Ukraynanın müharibəni bitirən sazişə yaxınlaşdığını düşündüyünü deyib. O hesab edir ki, hər iki tərəf artıq razılaşmaq istədiyini deməyə hazır vəziyyətdədir.
"Financial Times" qəzeti Trampla müsahibəsində bu sözləri dərc edib və əlavə edib ki, Ukrayna danışıqçıları prezidentin nikbinliyini bölüşmür.
Növbəti görüş noyabrın 10-11-də Əbu-Dabidə olacaq. Rusiya nümayəndə heyətinə Putinin köməkçisi Vladimir Medinski başçılıq edəcək. Ukrayna prezidenti Volodimir Zelenski bir gün əvvəl Berlində bu danışıqların Putinlə üçtərəfli görüşə yol açacağına ümid etdiyini demiş, Moskvaya getmək variantını isə rədd etmişdi.
Trampın sözləri Rusiyanın Ukraynaya hücumlarının davam etdiyi vaxta düşür. Ukrayna tərəfi son sutkada ən azı 38 dinc sakinin öldüyünü bildirib, Rusiyanın enerji sisteminə kütləvi zərbələrindən sonra Kiyevdə su kəsilib, metro dayanıb.
