Tramp İrana yaxın vaxtda zərbə planı olmadığını deyir, "The New York Times" isə ABŞ ordusunun planı hazırladığını yazır

ABŞ prezidenti Donald Tramp İrana yaxın vaxtda yeni zərbə endirmək planı olmadığını deyib, amma lazım olarsa, buna hazır olduğunu əlavə edib. O bunu aralıq seçkilər günü "Financial Times" qəzetinə telefon müsahibəsində deyib: "Biz, deyəsən, istədiyimiz hər şeyi alırıq".

"The New York Times" qəzeti məlumatlı mənbələrə istinadən yazır ki, ABŞ ordusunun Yaxın Şərq üzrə Mərkəzi Komandanlığı (CENTCOM) zərbə planı hazırlayıb və plan seçkilərdən sonra, hətta çərşənbə günü icra oluna bilər. Qəzetin mənbələrinə görə, Trampın komandası bölünüb: bir qrup Hörmüz boğazının blokadasını davam etdirməyi, digəri hərbi əməliyyatı təklif edir.

Tramp İranla vasitəçilər vasitəsilə danışıqların, xüsusən zənginləşdirilmiş uran ehtiyatı üzərində davam etdiyini bildirib. "Yüzlərlə ton qayanın altında olsa da, orada qalmasından razı deyiləm", - deyib. "Reuters" agentliyinə danışan yüksək rütbəli İran rəsmisi isə tərəflərin müharibəni bitirən razılaşmadan hələ uzaq olduğunu bildirib.

İran yeni hücuma qarşı "maksimum çəkindirmə" planının hazır olduğunu, cavabın dərhal veriləcəyini deyir. Tehran ABŞ və İsrail hədəflərinin siyahısını genişləndirdiyini də bildirib.

Bu arada Böyük Britaniyanın Dəniz Ticarət Əməliyyatları Mərkəzi (UKMTO) Hörmüz boğazı yaxınlığında, Omanın Lima limanından 26 kilometr şimal-şərqdə neft tankerinin vurulduğunu açıqlayıb. Tankerin təhlükəsizlik əməkdaşının sözlərinə görə, mühərrik bölməsinə iki naməlum mərmi dəyib. Kimin vurduğu bildirilmir.