İran İnqilab Keşikçiləri: Hörmüz boğazında dörd tanker minaya düşüb məhv olub, daha ikisi saxlanılıb

İran İslam İnqilabı Keşikçiləri Korpusu noyabrın 4-də Hörmüz boğazında dörd neft tankerinin dəniz minalarına düşərək məhv olduğunu, ikisinin hələ də yandığını bildirib. "Tasnim" agentliyinin yaydığı məlumata görə, daha iki tanker saxlanılıb. Keşikçilər gəmilərin boğazın qadağan olunmuş cənub marşrutu ilə keçməyə çalışdığını deyir.

BBC yazır ki, bu iddianı müstəqil təsdiqləyə bilməyib. Keşikçilər bir gün əvvəl də üç tankerin minaya düşdüyünü və boğaz üzərində ABŞ-nin MQ-9 pilotsuz təyyarəsini vurduqlarını bildirmişdilər. ABŞ rəsmiləri isə Qeşm adasına zərbələri Keşikçilərin Amerika təyyarəsinə atəş açmasına cavab kimi təqdim edir.

İran parlamentinin sədri, baş danışıqçı Məhəmmədbağır Qalibaf ABŞ-dəki seçkilərin nəticəsi barədə X sosial şəbəkəsində yazıb: "İstər vicdan, istər yaşayış xərcləri olsun, amerikalılar müharibəyə "yox" dedi və biz bu mesajı dəstəkləyirik". O əlavə edib ki, ABŞ hökuməti öz xalqının iradəsinə xəyanət etsə, İranın "yox"unun "kabusla" gəldiyini görəcək.

Prezident Məsud Pezeşkian döyüşlər yenidən başlasa, "bu müharibədən heç kəsin qazanmayacağını" deyib. Tramp isə Benyamin Netanyahunun bu həftə İrana yenidən zərbə endiriləcəyi barədə sözlərinə cavabında "Financial Times" qəzetinə hazır olduqlarını, amma buna ehtiyac olmaya biləcəyini bildirib.

Müharibə fevralda ABŞ və İsrailin İrana birgə zərbələri ilə başlayıb, İran bunun cavabında Hörmüz boğazını bağlayıb. Danışıqlar aylardır nəticə vermir.