Moskva meri: Gecə ərzində paytaxta uçan 57 pilotsuz aparat vurulub
Foto: mos.ru, CC BY 4.0, Wikimedia CommonsMoskva meri Sergey Sobyanin bazar ertəsi səhər bildirib ki, Rusiyanın paytaxtına doğru uçan 57 pilotsuz uçuş aparatı vurulub. Sobyanin rəqəmi gecə boyu bir neçə dəfə yeniləyib: əvvəl 15, sonra 47, ən sonda isə 57 dronun vurulduğunu yazıb.
Merin “Max” messencerindəki kanalında yazdığına görə, dron qalıqlarının düşdüyü yerlərdə fövqəladə xidmətlərin mütəxəssisləri işləyir.
Hücum hava nəqliyyatına da təsir edib. Moskvanın “Vnukovo” və “Şeremetyevo” hava limanları bir müddət reysləri yalnız razılaşdırma ilə qəbul edib və yola salıb, Yaroslavl hava limanı isə işini dayandırıb. Soçi, Nijni Novqorod və Krasnodar hava limanlarında da müvəqqəti məhdudiyyətlər tətbiq olunub. Səhərə doğru “Vnukovo”da məhdudiyyətlər götürülüb, Krasnodar və Soçi hava limanları işini bərpa edib.
Yaroslavl vilayətinin qubernatoru Mixail Yevrayev yazıb ki, vilayətin ərazisində 5 dron radioelektron mübarizə vasitələri ilə sıradan çıxarılıb. Hücum zamanı Yaroslavldan Moskvaya gedən yolda hərəkət bir müddət dayandırılıb, sonra bərpa olunub. Gecə Krım körpüsündə də avtomobil hərəkəti müvəqqəti bağlanıb.
Ukrayna son günlər Rusiyanın daxili bölgələrinə dron hücumlarını artırıb: bir gün əvvəl Tatarıstan və Rostov vilayətlərində sənaye və enerji obyektlərinin, Həştərxan vilayətində isə hərbi aerodromun hədəfə alındığı bildirilmişdi. Moskvaya hücum Putin, Tramp və Si Cinpinin noyabrın 19-da Çinin Şençjen şəhərində keçirəcəyi üçtərəfli görüşdən üç gün əvvəl baş verib. Görüş Ukraynada müharibənin dayandırılması ilə bağlı danışıqların fəallaşdığı vaxta düşür.


