Putinin heyəti ilə Əbu-Dabi danışıqlarında Ukrayna nümayəndələrinə xarici kəşfiyyat rəhbərinin başçılıq edəcəyi deyilir
Arxiv foto: Anton Şevelyov, CC BY-SA 4.0, Wikimedia CommonsUkraynanın noyabrın 10-11-də Birləşmiş Ərəb Əmirliklərinin paytaxtı Əbu-Dabidə Rusiya və ABŞ ilə keçirəcəyi danışıqlarda heyətə Xarici Kəşfiyyat Xidmətinin rəhbəri Rustem Umerovun başçılıq edəcəyi deyilir.
“RBK-Ukrayna” nəşri məlumatlı mənbəyə istinadən yazır ki, heyətdə Prezident Ofisinin rəhbəri Kirilo Budanov, onun birinci müavini Sergey Kislitsa, parlamentdə “Xalqın xidmətçisi” fraksiyasının rəhbəri David Araxamiya və Müdafiə Nazirliyi Baş Kəşfiyyat İdarəsi rəisinin müavini Vadim Skibitski də olacaq. Danışıqlarda Xarici Kəşfiyyat Xidmətinin bir analitiki də iştirak edəcək.
Nəşrin mənbəsinə görə, Prezident Volodimir Zelenski danışıqların hərbi istiqamətini Baş Qərargahın keçmiş rəisi Andrey Hnatova həvalə edib, lakin Hnatov bu dəfə Əbu-Dabiyə getməyəcək. Bu istiqamət üzrə onunla Skibitski işləyəcək. Mənbə Əbu-Dabidə Avropa ölkələrinin nümayəndələri ilə ayrıca görüş formatlarının da nəzərdə tutulduğunu deyib.
“CBS News” telekanalı noyabrın 6-da Budanovla söhbətdən sonra heyətə məhz onun rəhbərlik edəcəyini xəbər vermişdi. Prezident Ofisi bu məlumatı təsdiqləməyib və Budanovun heyətin başçısı deyil, üzvü olacağını bildirib. Umerov noyabrın 4-5-də Brüsseldə ABŞ və Avropa nümayəndələri ilə Ukraynaya təhlükəsizlik zəmanətlərini müzakirə edib. Zelenski isə noyabrın 4-də Prezident Donald Trampın xüsusi nümayəndələri Stiv Vitkoff və Cared Kuşnerlə danışıqlar barədə telefonla bir saat yarım söhbət edib.
Rusiyanı danışıqlarda Kremlin sözçüsü Dmitri Peskovun təsdiqlədiyi tərkibdə Putinin köməkçisi Vladimir Medinski, xarici işlər nazirinin müavinləri Sergey Ryabkov və Mixail Qaluzin, eləcə də Baş Qərargahın iki rəhbər şəxsi təmsil edəcək. Tərəflər bu formatda fevraldan bəri ilk dəfə görüşür. Fransanın xarici işlər naziri Jan-Noel Barro bazar günü Fransanın da Əbu-Dabidə olacağını deyib.


