Tofiq Yaqublunun qızı həbsxanada atasına təzyiqlərin artdığını deyir, siyasətçi bu gün ailəsinə zəng etməyib

Arxiv foto: Voice of America, Public domain, Wikimedia Commons
12-11-2026 14:57

Həbsdəki müxalif siyasətçi, Müsavat Partiyasının və Milli Şuranın üzvü Tofiq Yaqublunun ailəsi onun vəziyyətindən narahat olduğunu bildirir. Siyasətçinin qızı Nigar Həzi noyabrın 12-də sosial şəbəkə hesabında yazıb ki, atası zəng günlərində adətən saat 10-11 arası evə zəng edir, bu gün isə iki saatdan çox keçsə də, ailə ilə əlaqə saxlamayıb.

Nigar Həzinin sözlərinə görə, noyabrın 10-dakı görüşdə atası 17 saylı cəzaçəkmə müəssisəsində ona qarşı təzyiqlərin yenidən başladığını deyib. Həzi bunu görüş günü ictimailəşdirmədiyini, təzyiqlərin səngiyəcəyini düşündüyünü yazıb: “Ancaq bu gün atanın evə zəng etməməsi bizdə ciddi narahatlıq və onun başına nəsə gəldiyi ehtimalını yaradır”.

Həzi iddia edir ki, təzyiqlər oktyabrın 27-də Prezident İlham Əliyevin sərəncamı ilə ədliyyə nazirinin müavini - Penitensiar Xidmətin rəisi təyin olunan Sahib Rzayevin gəlişindən sonra başlayıb. O, həbsxanada yarımqapalı rejim və antisanitariya olduğunu yazıb, təzyiqlərin sifarişinin Prezident Administrasiyasından gəldiyini deyib. Penitensiar Xidmət bu iddialarla bağlı hələlik açıqlama verməyib.

Tofiq Yaqublu 2023-cü ilin dekabrında saxlanılıb. Bakı Ağır Cinayətlər Məhkəməsi 2025-ci il martın 10-da onu külli miqdarda ziyan vurmaqla dələduzluq və saxta sənəd hazırlama ittihamları ilə 9 il azadlıqdan məhrum edib. Hökm apellyasiya və kassasiya instansiyalarında qüvvədə saxlanılıb, Ali Məhkəmə 2026-cı il aprelin 2-də şikayəti təmin etməyib.

Yaqublu ittihamları qəbul etmir və həbsini siyasi motivli sayır. O, 2025-ci ildə həbsxanada aclıq aksiyası keçirib, bu ilin martında isə vəkili onun qısa müddətdə ciddi çəki itirdiyini bildirib.

Digər xəbərlər