Şəkidə bəziləri 150 yaşlı fıstıq ağaclarını kəsib satmaqda şübhəli bilinən 6 nəfər saxlanılıb

İllüstrativ foto: Şəki meşəsi. Tudor Breban, CC BY-SA 4.0, Wikimedia Commons
12-11-2026 12:28

Şəki rayonunun Kiş kəndi ərazisində qiymətli ağacları qanunsuz kəsib emal etməkdə və satmaqda şübhəli bilinən altı rayon sakini saxlanılıb.

Daxili İşlər Nazirliyinin məlumatına görə, əməliyyatı nazirliyin Baş Mütəşəkkil Cinayətkarlıqla Mübarizə İdarəsi Ekologiya və Təbii Sərvətlər Nazirliyinin Dövlət Ekoloji Təhlükəsizlik Xidməti ilə birgə keçirib. Nazirlik bildirir ki, ərazidə saxlanılanların kəsdiyi 100-dən çox fıstıq ağacının kökü tapılıb, ekspertlərin rəyinə görə, ağacların bəzilərinin yaşı 100-150 il olub.

Nazirlik saxlanılanların ağacları emal etdikdən sonra satdığını iddia edir. Qurumun sözlərinə görə, araşdırma davam edir, işdə başqa şəxslərin də olub-olmadığı yoxlanılır.

Fıstıq Böyük Qafqazın cənub yamacındakı meşələrin əsas ağac növlərindən biridir. Daxili İşlər Nazirliyi vətəndaşlara xatırladıb ki, ağacların və yaşıllıqların qanunsuz kəsilməsi, məhv edilməsi və zədələnməsi qanunla nəzərdə tutulan hallarda cinayət məsuliyyətinə səbəb ola bilər, belə hallarla rastlaşanları dərhal polisə xəbər verməyə çağırıb.

Digər xəbərlər